దసరా పండుగను పురస్కరించుకుని ‘సన్ ఆఫ్ కనకదుర్గమ్మ’ చిత్ర బృందం ఓ ప్రత్యేక పోస్టర్‌ను విడుదల చేసింది. ప్రముఖ నిర్మాత అశ్వనీదత్, ఆయన కుమార్తె స్వప్న దత్ చేతుల మీదుగా ఈ పోస్టర్‌ను ఆవిష్కరించారు. ఇందులో నటి లయ అమ్మవారి రూపంలో ఎంతో పవర్‌ఫుల్‌గా కనిపిస్తూ ప్రేక్షకులను ఆకట్టుకుంటున్నారు.

లయ, అనురూప్ కటారి, ఆకాంక్ష త్యాగరాజన్ ప్రధాన పాత్రల్లో నటిస్తున్న ఈ చిత్రానికి దుర్గ ఫణిధర్ దర్శకత్వం వహిస్తున్నారు. రాగ మూవీస్, తిలోత్తమ ప్రొడక్షన్స్ బ్యానర్లపై వాణి శంకర్, తిలోత్తమ సంయుక్తంగా ఈ యాక్షన్ అడ్వెంచర్ చిత్రాన్ని నిర్మిస్తున్నారు. కాకర్ల గోవర్దనరావు ఈ చిత్రానికి కథను అందించారు.

ఈ సినిమా నిధి అన్వేషణ అనే ఆసక్తికరమైన కాన్సెప్ట్‌తో రూపొందుతోంది. పోస్టర్‌ను విడుదల చేసిన అశ్వనీదత్, స్వప్న దత్ చిత్ర బృందానికి శుభాకాంక్షలు తెలిపారు. ముఖ్యంగా అమ్మవారిగా లయ కనిపించే సన్నివేశాలు ప్రేక్షకులకు రోమాలు నిక్కబొడుచుకునేలా ఉంటాయని, విజువల్స్, యాక్షన్ సన్నివేశాలు హైలైట్‌గా నిలుస్తాయని చిత్ర యూనిట్ ధీమా వ్యక్తం చేస్తోంది.

ఈ చిత్రానికి శశిధర్ లంక సంగీతం అందిస్తుండగా, శామ్ కే ప్రసన్ నేపథ్య సంగీతం సమకూరుస్తున్నారు. ప్రసాద్ కేవీ సినిమాటోగ్రఫీ, రాఘవేందర్ రెడ్డి ఎడిటింగ్ బాధ్యతలు నిర్వర్తిస్తున్నారు. రాజేష్ లంక యాక్షన్ కొరియోగ్రఫీ అందిస్తున్నారు. త్వరలోనే సినిమాకు సంబంధించిన మరిన్ని వివరాలు వెల్లడిస్తామని నిర్మాతలు తెలిపారు.