ఐపీఎల్ సీజన్ ఆరంభంలోనే ఫ్రాంచైజీలకు కొత్త తలనొప్పి మొదలైంది. వేలంలో కోట్లాది రూపాయలు కుమ్మరించి కొనుగోలు చేసిన ఆస్ట్రేలియా ఆటగాళ్లు గాయాలు, ఫిట్‌నెస్ సమస్యల కారణంగా పూర్తిస్థాయిలో అందుబాటులో లేకపోవడం ఇప్పుడు చర్చనీయాంశమైంది. ముఖ్యంగా కోల్‌కతా నైట్ రైడర్స్ (కేకేఆర్) రూ. 25.20 కోట్లు వెచ్చించి తీసుకున్న కామెరాన్ గ్రీన్ బౌలింగ్ చేయకపోవడం ఈ సమస్య తీవ్రతకు అద్దం పడుతోంది.

సీజన్ తొలి మ్యాచ్‌లోనే గ్రీన్ కేవలం బ్యాట్స్‌మన్‌గా బరిలోకి దిగి 18 పరుగులు మాత్రమే చేశాడు. వెన్నునొప్పి సర్జరీ నుంచి కోలుకుంటున్నందున అతను బౌలింగ్ చేయలేడని కేకేఆర్ కెప్టెన్ అజింక్య రహానే స్వయంగా వెల్లడించాడు. "మా బౌలర్లు గాయపడ్డారు. గ్రీన్ బౌలింగ్ చేయలేకపోవడం సవాలుగా మారింది. అతను బౌలింగ్ మొదలుపెడితే జట్టు కూర్పు భిన్నంగా ఉంటుంది" అని రహానే పేర్కొన్నాడు. గ్రీన్ బౌలింగ్ గురించి ప్రశ్నించగా.. 'ఆ ప్రశ్న మీరు క్రికెట్ ఆస్ట్రేలియాను అడగాలి' అంటూ చమత్కరించడం పరిస్థితికి నిదర్శనం.

ఈ సమస్య కేవలం కేకేఆర్‌కే పరిమితం కాలేదు. రాయల్ ఛాలెంజర్స్ బెంగళూరు ఆటగాడు జోష్ హేజిల్‌వుడ్ ఫిట్‌నెస్ కారణంగా తొలి మ్యాచ్‌కు దూరమయ్యాడు. సన్‌రైజర్స్ హైదరాబాద్ కెప్టెన్ పాట్ కమిన్స్, ఢిల్లీ క్యాపిటల్స్ ఆటగాడు మిచెల్ స్టార్క్ కూడా గాయాలతో ఇబ్బంది పడుతున్నారు. ఆటగాళ్ల వర్క్‌లోడ్ మేనేజ్‌మెంట్ పేరుతో క్రికెట్ ఆస్ట్రేలియా (సీఏ) వారిపై నియంత్రణ విధించడమే దీనికి ప్రధాన కారణంగా కనిపిస్తోంది. రాబోయే రెండేళ్లలో 20 టెస్టులు ఆడాల్సి ఉన్నందున, సీఏ తమ ఆటగాళ్ల ఫిట్‌నెస్‌కు అధిక ప్రాధాన్యత ఇస్తోంది.

ఈ పరిణామాలతో ఫ్రాంచైజీలు తీవ్రంగా నష్టపోతున్నాయి. కోట్లు ఖర్చు చేసినా ఆటగాళ్ల సేవలను పూర్తిస్థాయిలో వినియోగించుకోలేకపోతున్నాయి. గాయపడిన ఆటగాళ్ల విషయంలో బీసీసీఐ నుంచి ఎలాంటి నష్టపరిహారం లేకపోవడంతో ఆర్థిక భారం మొత్తం ఫ్రాంచైజీలపైనే పడుతోంది. వేలానికి ముందే ఆటగాళ్ల లభ్యతపై స్పష్టత ఉండాలని, అవసరమైతే మధ్యలో ప్రత్యామ్నాయ ఆటగాళ్లను అనుమతించే నిబంధనలు తీసుకురావాలని, క్రికెట్ ఆస్ట్రేలియా వంటి బోర్డులు ఫ్రాంచైజీలకు నష్టపరిహారం చెల్లించాలా అనే డిమాండ్లు ఇప్పుడు బలంగా వినిపిస్తున్నాయి.