కోల్‌కతాలోని ఈడెన్ గార్డెన్స్ వేదికగా కోల్‌కతా నైట్ రైడర్స్ (KKR), పంజాబ్ కింగ్స్ (PBKS) జట్ల మధ్య జరుగుతున్న ఐపీఎల్ మ్యాచ్‌కు వర్షం అంతరాయం కలిగించింది. కేకేఆర్ ఇన్నింగ్స్ 3.4 ఓవర్ల వద్ద వర్షం మొదలవడంతో అంపైర్లు ఆటను నిలిపివేశారు. ఆ సమయానికి కోల్‌కతా 2 వికెట్ల నష్టానికి 25 పరుగులు చేసింది. క్రీజులో అజింక్యా రహానే (8), అంగ్‌క్రిష్ రఘువంశీ (7) ఉన్నారు.

అంతకుముందు టాస్ గెలిచిన కేకేఆర్ కెప్టెన్ బ్యాటింగ్ ఎంచుకున్నాడు. అయితే, పంజాబ్ బౌలర్ జేవియర్ బార్ట్‌లెట్ ఆరంభంలోనే కేకేఆర్‌ను దెబ్బతీశాడు. ఓపెనర్ ఫిన్ అలెన్ (6), కామెరాన్ గ్రీన్ (4) వికెట్లు పడగొట్టి కోల్‌కతాను ఒత్తిడిలోకి నెట్టాడు. బార్ట్‌లెట్ కేవలం 1.4 ఓవర్లలో 9 పరుగులిచ్చి 2 వికెట్లు తీయడం విశేషం.

ఆట ప్రారంభమైన కొద్దిసేపటికే వర్షం రావడంతో మైదానం సిబ్బంది వెంటనే పిచ్‌తో పాటు మైదానం మొత్తాన్ని కవర్లతో కప్పివేశారు. మధ్యలో కొద్దిసేపు వర్షం ఆగిపోవడంతో కవర్లు తీసినప్పటికీ, మళ్లీ చినుకులు మొదలవడంతో ఆటను కొనసాగించలేకపోయారు. ప్రస్తుతం తేలికపాటి వర్షం కురుస్తుండటంతో మ్యాచ్ పునఃప్రారంభం ఆలస్యమవుతోంది. ఈడెన్ గార్డెన్స్‌లో మైదానం మొత్తాన్ని కప్పే సదుపాయం ఉన్నందున, వర్షం పూర్తిగా ఆగితే ఆట త్వరలోనే మొదలయ్యే అవకాశం ఉంది.