స్పీడ్‌క్యూబింగ్ ప్రపంచంలో మరో కొత్త రికార్డు న‌మోదైంది. చైనాకు చెందిన యువకుడు జువానీ గెంగ్ 3x3x3 రూబిక్స్ క్యూబ్‌ను కేవలం 3.71 సెకన్ల సగటు సమయంలో పరిష్కరించి సరికొత్త ప్రపంచ రికార్డును నెలకొల్పాడు. ఈ అద్భుతమైన ప్రదర్శనతో స్పీడ్‌క్యూబింగ్ రంగంలో తన ఆధిపత్యాన్ని మరోసారి నిరూపించుకున్నాడు.

ఈ ఏడాది ఏప్రిల్ 26న చైనాలోని జెజియాంగ్‌లో జరిగిన 'డెకింగ్ స్మాల్ అండ్‌ స్పెషల్ 2026' పోటీల్లో గెంగ్ ఈ ఘనత సాధించాడు. గిన్నిస్ వరల్డ్ రికార్డ్స్ నివేదిక ప్రకారం ఈ పోటీలో అతను ఐదుసార్లు క్యూబ్‌ను పరిష్కరించాడు. అందులో వరుసగా 3.79, 4.33, 3.61, 3.74, 2.80 సెకన్ల సమయాలను నమోదు చేశాడు. వరల్డ్ క్యూబ్ అసోసియేషన్ (డ‌బ్ల్యూసీఏ) నిబంధనల ప్రకారం, అత్యంత వేగవంతమైన, అత్యంత నెమ్మదైన సమయాలను తొలగించి, మిగిలిన మూడు సమయాల సగటును లెక్కించగా అది 3.71 సెకన్లుగా నమోదైంది.

విశేషమేమిటంటే ఈ రికార్డుతో గెంగ్ తన పాత రికార్డును తానే బద్దలు కొట్టాడు. ఈ ఏడాది జనవరి 11న బీజింగ్‌లో జరిగిన పోటీల్లో 3.84 సెకన్ల సగటు సమయంతో నెలకొల్పిన రికార్డును ఇప్పుడు అధిగమించాడు. జువానీ గెంగ్ ఈ విజయం, పోటీతత్వ స్పీడ్‌క్యూబింగ్‌లో వేగంగా అభివృద్ధి చెందుతున్న ప్రమాణాలకు, అసాధారణమైన కచ్చితత్వానికి నిదర్శనంగా నిలుస్తోంది.