భారత క్రికెట్ జట్టు మాజీ కెప్టెన్, హెడ్ కోచ్ రాహుల్ ద్రవిడ్ కొత్త అవతారమెత్తాడు. త్వరలో ప్రారంభం కానున్న యూరోపియన్ టీ20 ప్రీమియర్ లీగ్ (ETPL)లో ఆయన ఒక ఫ్రాంచైజీకి యజమాని అయ్యాడు. డబ్లిన్ గార్డియన్స్ జట్టును ద్రవిడ్ సొంతం చేసుకున్నట్లు సోమవారం అధికారికంగా ప్రకటించాడు. 2026లో ప్రారంభం కానున్న ఈ లీగ్‌లో మొత్తం ఆరు జట్లు ఉండగా, ద్రవిడ్ చేరికతో ఫ్రాంచైజీల కూర్పు పూర్తయింది.

డబ్లిన్‌లో జరిగిన ఓ కార్యక్రమంలో ద్రవిడ్‌ను డబ్లిన్ ఫ్రాంచైజీ యజమానిగా పరిచయం చేశారు. ఈ కార్యక్రమానికి ఈటీపీఎల్ సహ వ్యవస్థాపకులు అభిషేక్ బచ్చన్, సౌరవ్ బెనర్జీతో పాటు ఇతర ఫ్రాంచైజీల యజమానులైన జాంటీ రోడ్స్, గ్లాస్గో ఫ్రాంచైజీ యజమాని విపుల్ అగర్వాల్ వంటి వారు హాజరయ్యారు. ఐర్లాండ్, స్కాట్లాండ్, నెదర్లాండ్స్ క్రికెట్ బోర్డుల ఉన్నతాధికారులు కూడా పాల్గొన్నారు. ఐసీసీ ఆమోదం పొందిన ఈ లీగ్‌లో డబ్లిన్, బెల్‌ఫాస్ట్, ఎడిన్‌బరో, గ్లాస్గో, ఆమ్‌స్టర్‌డామ్, రోటర్‌డామ్ నగరాల నుంచి జట్లు పాల్గొంటాయి.

ఈ సందర్భంగా రాహుల్ ద్రవిడ్ మాట్లాడుతూ.. "ఐరోపాలో క్రికెట్‌ను అభివృద్ధి చేయడం, యువ ప్రతిభను ప్రోత్సహించడం అనే గొప్ప విజన్ నన్ను ఈ లీగ్‌ వైపు ఆకర్షించింది. డబ్లిన్‌లో ఇప్పటికే క్రికెట్‌పై ఆసక్తి ఉన్న కమ్యూనిటీ ఉంది. వారికి అండగా నిలవడం నాకు ఎంతో ముఖ్యం" అని అన్నారు. అభిషేక్ బచ్చన్ మాట్లాడుతూ.. "ద్రవిడ్ వంటి దిగ్గజాలు మాతో చేరడం చాలా ప్రత్యేకం. ఇది ఐరోపాలో తర్వాతి తరం క్రికెటర్లను ప్రోత్సహించడానికి దోహదపడుతుంది" అని పేర్కొన్నాడు.

ఈ లీగ్‌లో మిచెల్ మార్ష్, గ్లెన్ మాక్స్‌వెల్, ఫాఫ్ డూప్లెసిస్, హెన్రిచ్ క్లాసెన్ వంటి అంతర్జాతీయ స్టార్లు ఆడనున్నారు. స్టీవ్ వా, క్రిస్ గేల్, జొంటీ రోడ్స్ వంటి దిగ్గజాలు కూడా వివిధ ఫ్రాంచైజీలతో భాగస్వాములుగా ఉన్నారు.