ఆంధ్రప్రదేశ్‌ను రక్షణ, డ్రోన్ తయారీ రంగంలో కీలక కేంద్రంగా మార్చే దిశగా మరో ముందడుగు పడింది. శ్రీ సత్యసాయి జిల్లా పుట్టపర్తిలో నేడు సుమారు రూ. 2,959 కోట్ల విలువైన మూడు కీలక డిఫెన్స్ ప్రాజెక్టులకు కేంద్ర రక్షణ శాఖ మంత్రి రాజ్‌నాథ్ సింగ్, ముఖ్యమంత్రి చంద్రబాబు శంకుస్థాపన చేశారు. రాష్ట్రంలో పెట్టుబడులు ఆకర్షించడంతో పాటు యువతకు ఉపాధి కల్పించడమే లక్ష్యంగా ఈ ప్రాజెక్టులను ప్రారంభించారు.

భారత్ డైనమిక్స్ లిమిటెడ్ (బీడీఎల్), కల్యాణి స్ట్రాటజిక్ సిస్టమ్స్ లిమిటెడ్, హెచ్‌ఎఫ్‌సీఎల్ సంస్థలు ఈ ప్రాజెక్టులను ఏర్పాటు చేయనున్నాయి. ఈ మూడు ప్రాజెక్టుల ద్వారా ప్రత్యక్షంగా, పరోక్షంగా దాదాపు 1,935 మందికి ఉపాధి అవకాశాలు లభించనున్నాయని అంచనా. వీటితో పాటు, పుట్టపర్తిలో ఏర్పాటు చేయనున్న "డ్రోన్ సిటీ"లో పలు డ్రోన్ తయారీ పరిశ్రమలకు కూడా శంకుస్థాపన చేశారు.

ఈ ప్రతిష్ఠాత్మక కార్యక్రమంలో ముఖ్యమంత్రితో పాటు రాష్ట్ర ఐటీ, ఎలక్ట్రానిక్స్ శాఖ మంత్రి నారా లోకేశ్‌, కేంద్ర పౌర విమానయాన శాఖ మంత్రి రామ్మోహన్ నాయుడు, రాష్ట్ర మంత్రులు టీజీ భరత్, సత్యకుమార్ యాదవ్, అనగాని సత్య ప్రసాద్ పాల్గొన్నారు. బీజేపీ ఏపీ అధ్యక్షుడు పీవీఎన్ మాధవ్, స్థానిక ప్రజా ప్రతినిధులు, ఆయా సంస్థల ప్రతినిధులు కూడా హాజరయ్యారు. ఈ ప్రాజెక్టులతో పుట్టపర్తి ప్రాంతం రక్షణ, ఏరోస్పేస్ రంగ పటంలో కీలక స్థానాన్ని సంపాదించుకోనుంది.