'పెద్ది'లో జాన్వీ పాత్రపై వివాదం.. ఇది ఖరీదైన అవమానం అంటూ సింగర్ పోస్ట్

రామ్ చరణ్ హీరోగా, బుచ్చిబాబు సానా దర్శకత్వంలో జూన్ 4న విడుదలైన 'పెద్ది' చిత్రం వివాదాలకు కేంద్రబిందువైంది. ఈ చిత్రంలో హీరో పాత్రకు సర్వత్రా ప్రశంసలు లభిస్తున్నప్పటికీ, హీరోయిన్ జాన్వీ కపూర్ పాత్రను కేవలం గ్లామర్‌కే పరిమితం చేస్తూ అసభ్యంగా చిత్రీకరించారనే విమర్శలు వెల్లువెత్తుతున్నాయి. ప్రముఖ గాయని సుమంగళి అరియనాయగం ఈ అంశంపై చిత్ర బృందాన్ని తప్పుబడుతూ సోషల్ మీడియాలో చేసిన పోస్ట్, ఈ చర్చకు మరింత ఆజ్యం పోసింది.

"భారతీయ సినిమాలో ఒక ప్రముఖ కథానాయికకు జరిగిన అత్యంత ఖరీదైన అవమానం" అనే శీర్షికతో 'రిఫరెన్స్ కమ్యూనిటీ' అనే ఇన్‌స్టాగ్రామ్ పేజీ చేసిన పోస్ట్ ఈ వివాదానికి మూలమైంది. కథలో హీరో పాత్రకు బలమైన సామాజిక నేపథ్యం ఉన్నప్పటికీ, హీరోయిన్ పాత్రను మాత్రం కేవలం రొమాంటిక్ సన్నివేశాలకు, గ్లామర్ ప్రదర్శనకు పరిమితం చేశారని ఆ పోస్ట్‌లో పేర్కొన్నారు.

విశేషమేమిటంటే, ఈ పోస్ట్‌ను జాన్వీ కపూర్ స్వయంగా లైక్ చేయడంతో, తన పాత్ర చిత్రణ పట్ల ఆమె కూడా అసంతృప్తిగా ఉన్నారనే ఊహాగానాలు జోరందుకున్నాయి.

ఈ పోస్ట్‌ను తన ఇన్‌స్టాగ్రామ్ స్టోరీలో పంచుకున్న గాయని సుమంగళి, "అధికారం లేకపోవడం వల్ల కలిగే వేదన గురించి కథను సిద్ధం చేయడానికి శక్తివంతమైన పురుషులందరూ ఒకచోట చేరారు. కానీ, అదే సమయంలో జాన్వీ కపూర్ పాత్రను కెమెరా ముందు కేవలం ఒక శరీరంగా, బలవంతపు ముద్దులకు వస్తువుగా, పాటల వరకే పరిమితమైన ఒక సాధనంగా మార్చేశారు" అంటూ తీవ్ర స్థాయిలో ధ్వజమెత్తారు.

సుమంగళి వ్యాఖ్యలు సామాజిక మాధ్యమాల్లో వైరల్ కావడంతో, భారీ బడ్జెట్ చిత్రాలలో మహిళా పాత్రల చిత్రణపై విస్తృత చర్చ మొదలైంది. ఒకవైపు 'పెద్ది' చిత్రం బాక్సాఫీస్ వద్ద ఘనమైన వసూళ్లు సాధిస్తున్నప్పటికీ, హీరోయిన్ పాత్రను తీర్చిదిద్దడంలో దర్శకుడు విఫలమయ్యారని పలువురు సినీ విశ్లేషకులు సైతం అభిప్రాయపడుతున్నారు. అయితే, ఈ విమర్శలపై చిత్ర బృందం ఇప్పటివరకు అధికారికంగా స్పందించలేదు.