పుణెలో కురుస్తున్న భారీ వర్షాల నేపథ్యంలో, వరద నీటిలో చిక్కుకున్న ఓ ఉద్యోగి 'వర్క్ ఫ్రమ్ హోమ్' అనుమతి కోరగా, దానికి అతని మేనేజర్ ఇచ్చిన సమాధానం ప్రస్తుతం సోషల్ మీడియాలో తీవ్ర చర్చకు దారితీసింది. "నేను కార్యాలయానికి రాగలిగినప్పుడు, నువ్వు ఎందుకు రాలేవు?" అంటూ సదరు మేనేజర్ బాధ్యతారాహిత్యంగా బదులివ్వడంపై నెటిజన్లు తీవ్ర ఆగ్రహం వ్యక్తం చేస్తున్నారు.

ఇటీవల కురిసిన భారీ వర్షాల వల్ల తాను నివసించే ప్రాంతం జలమయమైందని, సురక్షితంగా కార్యాలయానికి చేరుకునే పరిస్థితి లేదని ఆ ఉద్యోగి తన మేనేజర్‌కు వాట్సాప్‌ ద్వారా వివరించాడు. సెలవు తీసుకోకుండా ఇంటి నుంచే విధులకు హాజరవుతానని విజ్ఞప్తి చేశాడు. 

అయితే, అందుకు మేనేజర్ స్పందిస్తూ, "ఏదో ఒక మార్గం చూసుకొని రావాల్సిందే" అని సమాధానమిచ్చినట్లు రెడిట్‌లోని 'ఇండియన్ వర్క్‌ప్లేస్' సబ్-రెడిట్‌లో పోస్ట్ చేసిన స్క్రీన్‌షాట్ల ద్వారా వెల్లడైంది. ఈ ఘటన జరిగిన రెండు నెలల తర్వాత కూడా సదరు మేనేజర్ ప్రవర్తనలో మార్పు రాలేదని, పనివేళలు ముగిసిన తర్వాత కూడా సందేశాలు పంపుతూ తన వ్యక్తిగత సమయానికి కనీస గౌరవం ఇవ్వడం లేదని బాధితుడు మరో పోస్టులో ఆవేదన వ్యక్తం చేశాడు.

ఈ వాట్సాప్ సంభాషణపై నెటిజన్లు తీవ్రంగా స్పందిస్తున్నారు. విపత్కర సమయాల్లో ఉద్యోగుల భద్రతకే ప్రథమ ప్రాధాన్యత ఇవ్వాలని పలువురు సూచిస్తున్నారు. పుణె, గురుగ్రామ్ వంటి నగరాల్లో వర్షాల కారణంగా కొన్ని కంపెనీలు వర్క్ ఫ్రమ్ హోమ్‌ను ప్రోత్సహిస్తున్నప్పటికీ, ఇలాంటి ఘటనలు పునరావృతం కావడంపై సర్వత్రా విమర్శలు వ్యక్తమవుతున్నాయి.