టాలీవుడ్‌లో సంచలన విజయం సాధించిన 'బేబీ' చిత్రం తర్వాత, ఆ చిత్ర నిర్మాతల నుంచి మరో ఆసక్తికరమైన ప్రేమకథ రేపు ప్రేక్షకుల ముందుకు వస్తోంది. యంగ్ హీరో కిరణ్ అబ్బవరం, శ్రీ గౌరి ప్రియ జంటగా నటించిన 'చెన్నై లవ్ స్టోరీ' అనే సినిమా శుక్రవారం (జులై 24న) ప్రపంచవ్యాప్తంగా థియేటర్లలో విడుదల కానుంది. 'కలర్ ఫొటో', 'బేబీ' వంటి విజయవంతమైన చిత్రాల నిర్మాతలు ఎస్కేఎన్, సాయి రాజేష్ ఈ సినిమాను నిర్మించడంతో దీనిపై మంచి అంచనాలు నెలకొన్నాయి.

ఈ సందర్భంగా నిర్మాత ఎస్కేఎన్ సోషల్ మీడియా వేదికగా ఓ భావోద్వేగభరితమైన పోస్ట్ చేశారు. "'బేబీ' విడుదలై మూడేళ్లు గడిచింది. 'చెన్నై లవ్ స్టోరీ' కోసం రెండేళ్లుగా మా హృదయం, ఆత్మ, సమయం, కష్టమంతా ధారపోశాం. ఒక జర్నలిస్టుగా మొదలై నిర్మాతగా మారిన నా ప్రయాణంలో ప్రతి అడుగు మీ ప్రేమ, ప్రోత్సాహం వల్లే సాధ్యమైంది. అందమైన, ఫీల్ గుడ్, ఎమోషనల్, ఇంటెన్స్ లవ్ స్టోరీని మీ ముందుకు తీసుకొస్తున్నాం. ఇది మాకు కుటుంబం లాంటి సినిమా. దయచేసి థియేటర్లలో సినిమా చూసి మీ టికెట్‌తో మమ్మల్ని ఆశీర్వదించండి. మీ ప్రేమనే మాకు మరిన్ని మంచి కథలు చెప్పే స్ఫూర్తినిస్తుంది" అని ఆయన పేర్కొన్నారు.

స్టీవెన్, నివి అనే ఇద్దరు యువతీ యువకుల ప్రేమ, కలలు, వారి జీవితాలను మార్చేసిన క్షణాల చుట్టూ ఈ కథ నడుస్తుందని చిత్ర యూనిట్ తెలిపింది. ఇది నిజాయతీతో కూడిన, తీవ్రమైన యూత్‌ఫుల్ లవ్ స్టోరీ అని వారు అభివర్ణించారు. మాస్ మూవీ మేకర్స్, అమృత ప్రొడక్షన్స్ బ్యానర్లపై రూపుదిద్దుకున్న ఈ చిత్రానికి రవి నంబూరి దర్శకత్వం వహించగా... ధీరజ్ మొగిలినేని సహ నిర్మాతగా వ్యవహరించారు. మణిశర్మ సంగీతం, అనంత శ్రీరామ్ సాహిత్యం, విశ్వాస్ డేనియల్ సినిమాటోగ్రఫీ బాధ్యతలు నిర్వర్తించారు. 'బేబీ' లాంటి బ్లాక్‌బస్టర్ అందించిన టీమ్ నుంచి వస్తుండటంతో 'చెన్నై లవ్ స్టోరీ'పై ప్రేక్షకుల్లో ఆసక్తి నెలకొంది.