జపాన్‌కు చెందిన ఒక వ్యక్తి తన భార్యతో ఏకంగా 20 ఏళ్ల పాటు కనీసం ఒక్క మాట కూడా మాట్లాడకుండా మౌనంగా ఉండిపోయాడు. ఒకే ఇంట్లో నివసిస్తూ, ముగ్గురు పిల్లలను పెంచుతున్నప్పటికీ వారి మధ్య ఎటువంటి సంభాషణలు సాగలేదు. ఈ వింత ఘటనకు సంబంధించిన వార్తలు ప్రస్తుతం సోషల్ మీడియాలో మరోసారి వైరల్ అవుతున్నాయి.

జపాన్‌లోని నారా నగరానికి చెందిన ఓకువో కటయామా, ఆయన భార్య యూమి మధ్య దాదాపు రెండు దశాబ్దాల పాటు మాటలు లేవు. పిల్లలపై తన భార్య చూపిస్తున్న మితిమీరిన ప్రేమ, శ్రద్ధను చూసి అసూయ చెందిన ఓకువో, ఆమెతో మాట్లాడటం మానేశారు. ఈ విషయాన్ని గమనించిన వారి చిన్న కుమారుడు, తల్లిదండ్రుల మధ్య నెలకొన్న ఈ సుదీర్ఘ మౌనానికి తెరదించాలని నిర్ణయించుకున్నాడు. ఇందుకోసం ఆయన ఒక స్థానిక టీవీ షో సహాయం కోరాడు.

ఆ టీవీ షో నిర్వాహకులు ఆ దంపతులు మొదటిసారి కలుసుకున్న పార్కులోనే ఒక ప్రత్యేక సమావేశాన్ని ఏర్పాటు చేశారు. పిల్లలు దూరంగా ఉండి గమనిస్తుండగా, ఓకువో ఎట్టకేలకు తన మౌనాన్ని వీడాడు. "మనం మాట్లాడుకుని చాలా కాలమైంది. నువ్వు పిల్లల పట్ల ఎంతో శ్రద్ధ తీసుకున్నావు. ఇన్నాళ్లు చాలా ఓపికగా ఉన్నావు, నీకు నా కృతజ్ఞతలు" అని భార్యతో చెప్పాడు. "నిజానికి నేను అసూయతోనే అలా మొండిగా వ్యవహరించాను. బహుశా జరిగిన కాలాన్ని ఇప్పుడు వెనక్కి తీసుకురాలేం" అని తన మనసులోని మాటను బయటపెట్టాడు.

ఈ భావోద్వేగపూరిత సంభాషణ అనంతరం ఆ దంపతులు మళ్లీ మామూలుగా మాట్లాడుకోవాలని నిర్ణయించుకున్నారు. వాస్తవానికి ఈ ఘటన 2017లోనే జరిగినప్పటికీ, అప్పట్లో ఇది ప్రపంచవ్యాప్తంగా ఆసక్తి రేకెత్తించింది. తాజాగా ఈ కథనం సోషల్ మీడియా వేదికగా మరోసారి చక్కర్లు కొడుతోంది.