క్రికెట్ అభిమానులు ఎంతో ఆసక్తిగా ఎదురుచూస్తున్న 2027 వన్డే ప్రపంచకప్‌నకు సంబంధించిన కీలక ప్రకటనను అంతర్జాతీయ క్రికెట్ మండలి (ఐసీసీ) జారీ చేసింది. ప్రపంచకప్‌కు చివరి అర్హత టోర్నమెంట్ అయిన క్వాలిఫయర్ షెడ్యూల్‌ను ఖరారు చేసింది. 10 జట్లు పాల్గొనే ఈ అర్హత పోటీల టోర్నీని వచ్చే ఏడాది (2027) ఫిబ్రవరి 22 నుంచి మార్చి 23 వరకు నిర్వహించనున్నట్లు వెల్లడించింది. అయితే, ఈ టోర్నీకి ఏ దేశం ఆతిథ్యం ఇవ్వనుందనే విషయంపై ఇంకా స్పష్టత రాలేదు.

దక్షిణాఫ్రికా, జింబాబ్వే, నమీబియా దేశాలు సంయుక్తంగా ఆతిథ్యమివ్వనున్న 2027 ఐసీసీ పురుషుల క్రికెట్ ప్రపంచకప్ అక్టోబర్ 4 నుంచి నవంబర్ 21 వరకు జరగనుంది. ఈ ప్రధాన టోర్నమెంట్‌లో పాల్గొనే చివరి జట్లను ఖరారు చేసేందుకు ఈ క్వాలిఫయర్ టోర్నీని నిర్వహిస్తున్నారు. 
క్రిక్‌ఇన్‌ఫో కథనం ప్రకారం, ఐసీసీ ఇప్పటికే షెడ్యూల్‌ను పూర్తి చేసినప్పటికీ, వేదికను ఖరారు చేసే పనిలో నిమగ్నమై ఉంది. ఈసారి ప్రపంచకప్‌ను 14 జట్లతో నిర్వహిస్తుండటంతో, అర్హత ప్రక్రియలో ఐసీసీ కీలక మార్పులు చేసింది.

కొత్త నిబంధనల ప్రకారం, క్వాలిఫయర్ టోర్నీలో విజేతగా నిలిచిన జట్టు నేరుగా ప్రపంచకప్‌లోని 12 జట్లు ఉండే ప్రధాన దశకు అర్హత సాధిస్తుంది. ఇక రెండు, మూడు, నాలుగు స్థానాల్లో నిలిచిన జట్లు టోర్నమెంట్‌లో కొత్తగా ప్రవేశపెట్టిన 'సూపర్ సిరీస్' అనే ఆరంభ దశకు చేరుకుంటాయి. ప్రధాన గ్రూప్ స్టేజ్‌లోని చివరి బెర్త్ కోసం ఈ జట్లు పోటీపడతాయి. ఈ మార్పుల వల్ల క్వాలిఫయర్ టోర్నీకి మరింత ప్రాధాన్యం ఏర్పడింది.

ఈ క్వాలిఫయర్ టోర్నీలో మొత్తం 10 జట్లు పాల్గొంటాయి. 2026 సెప్టెంబర్ 30 నాటికి ఐసీసీ వన్డే ర్యాంకింగ్స్‌లో ఆతిథ్య దేశాలైన దక్షిణాఫ్రికా, జింబాబ్వే మినహా అట్టడుగున ఉన్న రెండు పూర్తిస్థాయి సభ్య దేశాలు ఇందులో ఆడతాయి. వీటితో పాటు ఐసీసీ మెన్స్ క్రికెట్ వరల్డ్ కప్ లీగ్ 2 నుంచి టాప్ నాలుగు జట్లు, వరల్డ్ కప్ క్వాలిఫయర్ ప్లేఆఫ్ నుంచి మరో నాలుగు జట్లు ఈ టోర్నీలో తలపడతాయి.

ప్రస్తుత ర్యాంకింగ్స్ రేసు ముఖ్యంగా వెస్టిండీస్‌కు అత్యంత కీలకంగా మారింది. వన్డే ర్యాంకింగ్స్‌లో ప్రస్తుతం 10వ స్థానంలో ఉన్న కరేబియన్ జట్టు, క్వాలిఫయర్స్ ఆడకుండా నేరుగా అర్హత సాధించాలంటే తమ ర్యాంకును మెరుగుపరుచుకోవాల్సి ఉంది. సెప్టెంబర్ 30 కటాఫ్ తేదీలోపు వెస్టిండీస్‌కు భారత్‌తో కేవలం రెండు వన్డే మ్యాచ్‌లు మాత్రమే మిగిలి ఉన్నాయి. మరోవైపు, ఆఫ్ఘనిస్థాన్, ఐర్లాండ్ మధ్య జరగబోయే వన్డే సిరీస్ ఫలితం కూడా వెస్టిండీస్ భవితవ్యాన్ని ప్రభావితం చేయనుంది. దీంతో నేరుగా ప్రపంచకప్‌కు ఎవరు అర్హత సాధిస్తారనే దానిపై తీవ్ర ఉత్కంఠ నెలకొంది.