కేజీఎఫ్ స్టార్ యశ్ ప్రధాన పాత్రలో నటిస్తున్న తాజా చిత్రం 'టాక్సిక్: ఏ ఫెయిరీ టేల్ ఫర్ గ్రోనప్స్' ట్రైలర్ శనివారం విడుదలైంది. గ్యాంగ్‌స్టర్ డ్రామా నేపథ్యంలో తెరకెక్కుతున్న ఈ చిత్రం, తాజాగా విడుదలైన ట్రైలర్‌తో ఉత్కంఠభరితమైన యాక్షన్‌ సన్నివేశాలను పరిచయం చేసింది. గీతూ మోహన్‌దాస్ దర్శకత్వం వహించిన ఈ సినిమా ఆగస్టు 26న ప్రపంచవ్యాప్తంగా ప్రేక్షకుల ముందుకు రానుంది.

ఈ ట్రైలర్‌ను అద్భుతమైన విజువల్స్, రోమాంచితమైన యాక్షన్ సీక్వెన్స్‌లతో ఆకట్టుకునేలా రూపొందించారు. ప్రధానంగా రాయ (యశ్), అతని కుమారుడు టికెట్‌ మధ్య ఉన్న సంక్లిష్టమైన సంబంధాన్ని ఇందులో ఆవిష్కరించారు. కథలోని కీలక మలుపులను రహస్యంగా ఉంచుతూనే, "అరాచకం మరో అరాచకాన్ని కలిస్తే ఎలా ఉంటుంది" అనే ఆసక్తికరమైన థీమ్‌ను హైలైట్ చేశారు. నయనతార, కియారా అద్వానీ, తారా సుతారియా, రుక్మిణీ వసంత్, హుమా ఖురేషీ వంటి భారీ తారాగణం పోషించిన పాత్రలను సైతం ఈ ట్రైలర్‌లో పరిచయం చేయడం విశేషం.

కన్నడ, ఆంగ్ల భాషల్లో ఏకకాలంలో తెరకెక్కిన ఈ చిత్రం, తెలుగు, తమిళం, హిందీ, మలయాళం భాషల్లోకి అనువాదమై విడుదల కానుంది. కేవీఎన్ ప్రొడక్షన్స్, మాన్‌స్టర్ మైండ్ క్రియేషన్స్ సంస్థలు ఈ చిత్రాన్ని సంయుక్తంగా నిర్మిస్తున్నాయి. గతంలో ఈ సినిమాకు సంబంధించి విడుదలైన ఒక లుక్‌లోని శ్మశాన వాటిక సన్నివేశం వివాదాస్పదమై ఎఫ్ఐఆర్ కూడా నమోదైన సంగతి తెలిసిందే. పలుమార్లు వాయిదా పడుతూ వచ్చిన ఈ సినిమా విడుదల తేదీని చిత్ర యూనిట్ ఫాదర్స్ డే సందర్భంగా అధికారికంగా ఖరారు చేసింది. ప్రస్తుతం సోషల్ మీడియాలో ట్రెండ్ అవుతున్న ఈ టైలర్‌పై, ముఖ్యంగా సినిమా స్కేల్, యశ్ స్క్రీన్ ప్రెజెన్స్‌పై ప్రశంసల వర్షం కురుస్తోంది.
Play video