భారత టెస్ట్ జట్టు కెప్టెన్ శుభ్‌మన్ గిల్ సరికొత్త చరిత్ర సృష్టించేందుకు సిద్ధమయ్యాడు. శ్రీలంకతో జరగనున్న తొలి టెస్టులో అతను పలు అరుదైన రికార్డుల ముంగిట నిలిచాడు. ముఖ్యంగా ఇప్పటివరకు ఏ భారత కెప్టెన్‌కూ సాధ్యం కాని ఒక చారిత్రక ఘనతను అందుకునేందుకు కేవలం 50 పరుగుల దూరంలో ఉన్నాడు.

శ్రీలంకతో జరిగే తొలి టెస్టులో గిల్ 50 పరుగులు చేస్తే, ఒకే ప్రపంచ టెస్ట్ ఛాంపియన్‌షిప్ (డ‌బ్ల్యూటీసీ) సైకిల్‌లో 1000 పరుగులు పూర్తి చేసిన తొలి భారత కెప్టెన్‌గా చరిత్ర సృష్టిస్తాడు. ప్రస్తుతం 2025-27 డ‌బ్ల్యూటీసీ సైకిల్‌లో గిల్ ఖాతాలో 950 పరుగులు ఉన్నాయి. గతంలో 2019-21 సైకిల్‌లో విరాట్ కోహ్లీ 944 పరుగులతో ఈ ఘనతకు అత్యంత చేరువగా వచ్చాడు. యశస్వి జైస్వాల్, అజింక్య రహానే, రోహిత్ శర్మ వంటి ఆటగాళ్లు గతంలో ఒకే డ‌బ్ల్యూటీసీ సైకిల్‌లో 1000కి పైగా పరుగులు చేసినప్పటికీ, వారు ఆ సమయంలో పూర్తిస్థాయి కెప్టెన్లుగా లేరు.

ఇవే కాకుండా గిల్ మరో రెండు మైలురాళ్లపై కన్నేశాడు. టెస్ట్ క్రికెట్‌లో 3,000 పరుగుల క్లబ్‌లో చేరడానికి అతనికి కేవలం 31 పరుగులు అవసరం. అలాగే, డ‌బ్ల్యూటీసీ చరిత్రలో మొత్తంగా 3,000 పరుగులు పూర్తి చేసిన తొలి భారత బ్యాటర్‌గా నిలిచేందుకు 157 పరుగులు చేయాల్సి ఉంది.

ఈ చారిత్రక మ్యాచ్‌కు ముందు మీడియా సమావేశంలో గిల్ మాట్లాడాడు. స్వాతంత్ర్య దినోత్సవం నాడు, భారత్ ఆడుతున్న 600వ టెస్టుకు నాయకత్వం వహించడం ఎంతో ప్రత్యేకమని అన్నాడు. "దేశం తరఫున ఏ టెస్ట్ మ్యాచ్‌కు కెప్టెన్‌గా వ్యవహరించినా అది గొప్ప గౌరవం. అలాంటిది మన 600వ టెస్టుకు, అదీ స్వాతంత్ర్య దినోత్సవం నాడు కెప్టెన్సీ చేయడం నాకు దక్కిన గొప్ప గౌరవం, అదృష్టం. ఇది మాకు మరింత ప్రత్యేకం" అని గిల్ వివరించాడు.

గత ఏడాది కెప్టెన్సీ బాధ్యతలు చేపట్టిన తాను, ఈ పాత్రలో సౌకర్యవంతంగా ఉన్నానని తెలిపాడు. "గత ఏడాదిగా జట్టుగా మేం పురోగమిస్తున్న తీరు నాకెంతో సంతృప్తినిస్తోంది. సరైన దిశలోనే మేం అడుగులు వేస్తున్నామని నేను భావిస్తున్నాను" అని గిల్ పేర్కొన్నాడు.