ఉత్తరప్రదేశ్ కాంగ్రెస్ సీనియర్ నేత, సహారన్‌పూర్ ఎంపీ ఇమ్రాన్ మసూద్‌కు రాజకీయంగా గట్టి ఎదురుదెబ్బ తగిలింది. ఆయన అల్లుడు షయాన్ మసూద్ కాంగ్రెస్ పార్టీని వీడి, సమాజ్‌వాదీ పార్టీ (ఎస్పీ)లో చేరారు. ఈ పరిణామం పశ్చిమ యూపీ రాజకీయాల్లో చర్చనీయాంశంగా మారింది.

లక్నోలోని సమాజ్‌వాదీ పార్టీ కార్యాలయంలో జరిగిన ఒక కార్యక్రమంలో పార్టీ అధ్యక్షుడు, మాజీ ముఖ్యమంత్రి అఖిలేష్ యాదవ్ సమక్షంలో షయాన్ మసూద్ అధికారికంగా పార్టీలో చేరారు. ఈ సందర్భంగా అఖిలేష్ యాదవ్.. షయాన్‌కు పార్టీ ఎరుపు-ఆకుపచ్చ కండువా కప్పి సాదరంగా ఆహ్వానించారు. 

రాబోయే అసెంబ్లీ ఎన్నికల్లో తన కుటుంబం నుంచి ఎవరూ పోటీ చేయరని కొన్ని రోజుల క్రితం ఇమ్రాన్ మసూద్ ప్రకటించారు. ఈ ప్రకటన తర్వాత షయాన్ రాజకీయ వైఖరిపై ఊహాగానాలు మొదలయ్యాయి. ఆయన కాంగ్రెస్‌ను వీడుతారని ప్రచారం జరిగింది. ఈ ఊహాగానాలకు తెరదించుతూ, తన తండ్రి షజాన్ మసూద్‌తో కలిసి లక్నో వెళ్లి షయాన్ ఎస్పీ తీర్థం పుచ్చుకున్నారు.

షయాన్ మసూద్, దివంగత కేంద్ర మంత్రి, సహారన్‌పూర్‌ రాజకీయాల్లో ఎంతో పలుకుబడి ఉన్న ఖాజీ రషీద్ మసూద్ మనవడు. ఖాజీ రషీద్, ఇమ్రాన్ మసూద్‌కు మేనమామ. పశ్చిమ యూపీలో గట్టి రాజకీయ పట్టున్న మసూద్ కుటుంబంలో అంతర్గత రాజకీయ ఆకాంక్షల కారణంగానే ఈ పరిణామం చోటుచేసుకుందని విశ్లేషకులు భావిస్తున్నారు.

రానున్న అసెంబ్లీ ఎన్నికల్లో షయాన్ మసూద్‌కు ఎస్పీ టికెట్ ఇస్తుందా? లేదా? అన్నది ఇప్పుడు ఆసక్తికరంగా మారింది. ఈ చేరిక సహారన్‌పూర్‌తో పాటు పశ్చిమ యూపీ రాజకీయ సమీకరణాలను గణనీయంగా ప్రభావితం చేసే అవకాశం ఉంది.