టీమిండియా న్యూజిలాండ్‌ పర్యటనకు ఇప్పటినుంచే భారీ క్రేజ్‌ కనిపిస్తోంది. న్యూజిలాండ్‌ క్రికెట్‌ అంతర్జాతీయ సీజన్‌ టికెట్‌ విక్రయాలు రికార్డు స్థాయిలో ప్రారంభమయ్యాయి. క్రికెట్‌ నేషన్‌ సభ్యుల ప్రీ-సేల్‌ మొదలైన 48 గంటల్లోనే 26 వేల టికెట్లు అమ్ముడయ్యాయి.

భారత్‌ అక్టోబర్‌లో న్యూజిలాండ్‌లో పర్యటించనుంది. 12 మ్యాచ్‌ల సుదీర్ఘ మల్టీ-ఫార్మాట్‌ సిరీస్‌లో భాగంగా టీ20లు, వన్డేలు, టెస్టులు జరగనున్నాయి. ఆక్లాండ్‌లోని ఈడెన్‌ పార్క్‌లో జరిగే పరిమిత ఓవర్ల మ్యాచ్‌లకు టికెట్లకు భారీ డిమాండ్‌ ఏర్పడింది.

క్రైస్ట్‌చర్చ్‌లోని 9 వేల సీట్ల హాగ్లీ ఓవల్‌కు కూడా టికెట్ల విక్రయాలు జోరుగా సాగుతున్నాయి. అక్టోబర్‌ 22, 24 తేదీల్లో జరిగే తొలి రెండు టీ20లకు ఈ స్టేడియం పూర్తిగా నిండిపోయే అవకాశం ఉంది. నవంబర్‌ 27 నుంచి డిసెంబర్‌ 1 వరకు జరిగే రెండో టెస్టుకు కూడా భారీ స్పందన వస్తోంది.

వెల్లింగ్టన్‌లోనూ టికెట్లకు డిమాండ్‌ పెరిగింది. హెచ్‌ఎన్‌ఆర్‌వై స్టేడియంలో మూడో టీ20, రెండో వన్డే జరగనున్నాయి. తొలి టెస్టు నవంబర్‌ 19న బేసిన్‌ రిజర్వ్‌లో ప్రారంభమవుతుంది.

భారత పర్యటనపై అభిమానుల్లో ఉన్న ఉత్సాహమే రికార్డు విక్రయాలకు కారణమని న్యూజిలాండ్‌ క్రికెట్‌ చీఫ్‌ మార్కెటింగ్‌ అండ్‌ కమర్షియల్‌ ఆఫీసర్‌ గ్లెన్‌ క్రిట్చ్‌లీ తెలిపారు. గత సీజన్‌లో ఉన్న ధరలనే కొనసాగించామని చెప్పారు. క్రికెట్‌ నేషన్‌ కోడ్‌తో ఒక్కో టికెట్‌ ధర 30 న్యూజిలాండ్‌ డాలర్లలోపే ఉంటుందని వెల్లడించారు.

సెప్టెంబర్‌ 7 నుంచి సాధారణ టికెట్‌ విక్రయాలు ప్రారంభమవుతాయి. క్రికెట్‌ నేషన్‌లో సభ్యత్వం తీసుకున్న అభిమానులు ముందస్తు విక్రయాల్లో పాల్గొనవచ్చు. వారికి టికెట్లపై 15 శాతం రాయితీ లభిస్తుంది. పలు మ్యాచ్‌లకు హాజరయ్యేవారి కోసం ‘ది ఫోర్‌’, ‘ది సిక్స్‌’ గ్రూప్‌ టికెట్‌ ప్యాకేజీలను కూడా అందుబాటులో ఉంచారు.