సీఆర్‌డీఏ భేటీలో పలు ప్రాజెక్టులకు పరిపాలన అనుమతులు

అమరావతి అభివృద్ధికి సంబంధించి పలు కీలక ప్రాజెక్టులకు ఆంధ్రప్రదేశ్ రాజధాని ప్రాంత అభివృద్ధి ప్రాధికార సంస్థ (సీఆర్డీఏ) పరిపాలన అనుమతులు మంజూరు చేసింది. ముఖ్యమంత్రి నారా చంద్రబాబు నాయుడు అధ్యక్షతన సచివాలయంలో నిర్వహించిన సీఆర్‌డీఏ 65వ అథారిటీ సమావేశంలో ఈ మేరకు కీలక నిర్ణయాలు తీసుకున్నారు. ఈ సమావేశం అనంతరం పురపాలక శాఖ మంత్రి నారాయణ మీడియాకు వివరాలను వెల్లడించారు.

ఈ సమావేశంలో తీసుకున్న ముఖ్య నిర్ణయాలు ఇవి:

1. అమరావతిలో అత్యాధునిక లైబ్రరీ, కన్వెన్షన్ సెంటర్ నిర్మాణానికి రూ. 596 కోట్లు కేటాయింపు.
2. కీలకమైన మౌలిక సదుపాయాల అభివృద్ధి పనుల కోసం రూ. 1,430 కోట్లు.
3. రాజధాని పరిధిలోని 29 గ్రామాల లేఅవుట్‌లలో బీటీ (తారు) రోడ్ల అభివృద్ధి.
4. అమరావతి నుంచి మంగళగిరికి తాగునీటి సరఫరా ప్రాజెక్టు.
5. డిస్ట్రిక్ట్ కూలింగ్ సిస్టమ్ డ్రాఫ్ట్ మాస్టర్ ప్లాన్‌కు ఆమోదం.
6. నేషనల్ ఇన్‌స్టిట్యూట్ ఆఫ్ ఎలక్ట్రానిక్స్, ఐఓసీఎల్ గ్రీన్ ఎనర్జీ అభివృద్ధికి సంబంధించిన అనుమతులు.

వీటితో పాటు భూ సమీకరణలో భాగంగా రెండో దశలో భూములిచ్చిన రైతులకు కూడా రుణమాఫీ ప్రయోజనాన్ని వర్తింపజేయాలని ముఖ్యమంత్రి చంద్రబాబు నిర్ణయించారు. 2026 జనవరి 6వ తేదీ లేదా అంతకంటే ముందు రుణాలు తీసుకున్న రైతులకు ఈ నిర్ణయం వర్తిస్తుందని ప్రభుత్వం స్పష్టం చేసింది.