తెలంగాణ రాష్ట్ర రోడ్డు రవాణా సంస్థ (టీఎస్ఆర్టీసీ) ప్రయాణికుల సౌకర్యార్థం మరో కీలక నిర్ణయం తీసుకుంది. నాన్‌స్టాప్ బస్సు సర్వీసుల్లో ‘సెల్ఫ్ టికెటింగ్’ విధానాన్ని అందుబాటులోకి తీసుకురానుంది. బస్సు ఎక్కే ముందు టికెట్ కోసం వేచి చూసే అవసరం లేకుండా, ప్రయాణికులే స్వయంగా టికెట్ కొనుగోలు చేసేలా ఈ కొత్త విధానాన్ని రూపొందించింది.

ఈ విధానంలో భాగంగా ప్రయాణికులు బస్సు ఎక్కే ముందు డోర్ వద్ద ఏర్పాటు చేసిన క్యూఆర్ కోడ్‌ను తమ స్మార్ట్‌ఫోన్‌తో స్కాన్ చేయాలి. అనంతరం తాము ఎక్కే, దిగే స్టాప్‌ల వివరాలను నమోదు చేసి, ఆన్‌లైన్‌లో డబ్బులు చెల్లించగానే టికెట్ జనరేట్ అవుతుంది. ఆ డిజిటల్ టికెట్‌ను డ్రైవర్‌కు చూపిస్తే సరిపోతుంది.

ప్రయోగాత్మకంగా ఈ స్మార్ట్ టికెట్ విధానాన్ని తొలుత నల్గొండ-హైదరాబాద్ మార్గంలో అమలు చేయాలని ఆర్టీసీ నిర్ణయించింది. ఈ రూట్‌లో ప్రస్తుతం 45 డీలక్స్ నాన్‌స్టాప్ బస్సులు నడుస్తున్నాయి. ఇక్కడ ఈ విధానం విజయవంతమైతే, సెప్టెంబర్ నెలాఖరు నాటికి రాష్ట్రంలోని మిగతా అన్ని నాన్‌స్టాప్ రూట్లలోనూ విస్తరించాలని అధికారులు భావిస్తున్నారు.

ఈ కొత్త విధానం వల్ల ప్రయాణికులకు చిల్లర సమస్య తీరడంతో పాటు సమయం ఆదా అవుతుందని ఆర్టీసీ భావిస్తోంది. అదే సమయంలో డ్రైవర్లపై టికెట్లు జారీ చేసే పనిభారం కూడా తగ్గుతుంది. అయితే, స్మార్ట్‌ఫోన్‌లు లేనివారు, డిజిటల్ చెల్లింపులపై అవగాహన లేని ప్రయాణికులు యథావిధిగా డ్రైవర్ వద్దే టికెట్ కొనుగోలు చేయవచ్చని అధికారులు స్పష్టం చేశారు. ఈ సెల్ఫ్ టికెటింగ్ విధానం కోసం ‘మీ సేవ’కు చెందిన ‘మీ టికెట్’తో ఆర్టీసీ ఒప్పందం కుదుర్చుకుంది.