తెలుగుదేశం పార్టీ (టీడీపీ) రాష్ట్రవ్యాప్తంగా ప్రతిష్ఠాత్మకంగా నిర్వహిస్తున్న 'ఇంటింటికీ తెలుగుదేశం – 2 ఏళ్ల నమ్మకం – అభివృద్ధి, సంక్షేమం' కార్యక్రమం ఉత్సాహంగా కొనసాగుతోంది. ఆదివారంతో ఈ కార్యక్రమం 35వ రోజు పూర్తి చేసుకుంది. ఇప్పటివరకు రాష్ట్రవ్యాప్తంగా మొత్తం 94.22 లక్షల ఇళ్లను సందర్శించినట్లు టీడీపీ ఓ ప్రకటనలో వెల్లడించింది.

ఆదివారం ఒక్కరోజే టీడీపీ నాయకులు, కార్యకర్తలు 1,78,567 కుటుంబాలను నేరుగా కలిశారు. కూటమి ప్రభుత్వ రెండేళ్ల పాలనలో చేపట్టిన అభివృద్ధి, సంక్షేమ కార్యక్రమాలను ప్రజలకు వివరించడం, వారి అభిప్రాయాలను తెలుసుకోవడమే లక్ష్యంగా ఈ కార్యక్రమం సాగుతోంది. ప్రతి గడపకు వెళ్లి రైతులకు, మహిళలకు, యువతకు, పేద, మధ్యతరగతి వర్గాలకు అందుతున్న ప్రభుత్వ పథకాల ప్రయోజనాలను తెలియజేస్తున్నారు.

అదే సమయంలో, క్షేత్రస్థాయిలో ప్రజలు ఎదుర్కొంటున్న సమస్యలను అడిగి తెలుసుకుంటూ, వారి నుంచి సూచనలు, అభిప్రాయాలను సేకరిస్తున్నారు. రాష్ట్రవ్యాప్తంగా ప్రజల నుంచి తమ కార్యక్రమానికి విశేష స్పందన లభిస్తోందని, వారి భాగస్వామ్యంతో ఇది మరింత విస్తృతంగా సాగుతోందని టీడీపీ తెలిపింది. పార్టీ నాయకులు, కార్యకర్తలతో పాటు సాధారణ ప్రజలు కూడా ఈ కార్యక్రమంలో పాలుపంచుకుంటున్నారని ఆ ప్రకటనలో పేర్కొంది.