ఏపీ రాజధాని అమరావతి పరిరక్షణ సమితి (జేఏసీ) సభ్యుడు, ఉద్యమకారుడు ధనేకుల రామారావు అనారోగ్యంతో కన్నుమూశారు. ఆయన మృతి పట్ల ముఖ్యమంత్రి నారా చంద్రబాబు నాయుడు, మంత్రి నారా లోకేశ్ తీవ్ర సంతాపం వ్యక్తం చేశారు. అమరావతి ఉద్యమంలో రామారావు పోషించిన కీలక పాత్రను, ఆయన చేసిన త్యాగాలను వారు స్మరించుకున్నారు.

ఈ సందర్భంగా ముఖ్యమంత్రి చంద్రబాబు స్పందిస్తూ.. అమరావతి ఉద్యమం ప్రారంభమైన నాటి నుంచి రామారావు చురుకైన పాత్ర పోషించారని గుర్తు చేసుకున్నారు. రాజధాని కోసం సాగిన పోరాటంలో గత ప్రభుత్వ హయాంలో పెట్టిన అక్రమ కేసుల కారణంగా ఆయన జైలుకు కూడా వెళ్లారని చంద్రబాబు పేర్కొన్నారు. ధనేకుల రామారావు వంటి ఉద్యమకారుల త్యాగాలు, పోరాటాల వల్లే అమరావతి రాజధాని నిలబడిందని సీఎం ప్రశంసించారు. రామారావు ఆత్మకు శాంతి చేకూరాలని ప్రార్థిస్తూ, ఆయన కుటుంబ సభ్యులకు తన ప్రగాఢ సానుభూతిని తెలియజేశారు.

మరోవైపు, రాష్ట్ర ఐటీ, విద్యాశాఖ మంత్రి నారా లోకేశ్ కూడా ధనేకుల రామారావు మృతికి నివాళులు అర్పించారు. రామారావు మృతి బాధాకరమని, ఆయన సేవలు చిరస్మరణీయమని లోకేశ్ అన్నారు. అమరావతి ఉద్యమానికి ముందుండి నాయకత్వం వహించి, ఎన్నో కేసులు ఎదుర్కొన్నారని గుర్తుచేశారు. గత ప్రభుత్వ హయాంలో 40 రోజుల పాటు జైలులో నిర్బంధించినప్పటికీ, 'ఒకే రాష్ట్రం - ఒకే రాజధాని అమరావతి' అంటూ నినదించిన ఆయన పోరాట స్ఫూర్తి మరువలేనిదని లోకేశ్ కొనియాడారు. రామారావు కుటుంబ సభ్యులకు తన ప్రగాఢ సానుభూతిని ప్రకటించారు.