దేశీయ స్టాక్‌ మార్కెట్లు శుక్రవారం మిశ్రమంగా ముగిశాయి. రోజంతా పరిమిత శ్రేణిలో కదిలిన సూచీలు చివరకు మిశ్రమంగా స్థిరపడ్డాయి. సెన్సెక్స్‌ 19.63 పాయింట్లు నష్టపోయి 74,294.96 వద్ద స్థిరపడగా.. నిఫ్టీ 75.80 పాయింట్లు లాభపడి 23,346.40 వద్ద ముగిసింది.

నిఫ్టీ 23,300 స్థాయికి పైన ముగియడం మార్కెట్‌లో కీలక పరిణామంగా నిపుణులు పేర్కొన్నారు. ఈ స్థాయిని నిలబెట్టుకుంటే వచ్చే రోజుల్లో 23,500-23,600 వరకు నిఫ్టీ వెళ్లే అవకాశం ఉందని మార్కెట్‌ నిపుణులు తెలిపారు. 23,200, 23,000 స్థాయిలను కీలక మద్దతుగా పేర్కొన్నారు.

ఎంచుకున్న భారీ షేర్లలో కొనుగోళ్ల ఆసక్తి కనిపించింది. నిఫ్టీలో అదానీ పోర్ట్స్‌, అదానీ ఎంటర్‌ప్రైజెస్‌, భారతీ ఎయిర్‌టెల్‌ టాప్‌ గెయినర్లుగా నిలిచాయి. విస్తృత మార్కెట్‌ మాత్రం బెంచ్‌మార్క్‌ సూచీలను మించి రాణించింది.

నిఫ్టీ మిడ్‌క్యాప్‌ 1.24 శాతం, స్మాల్‌క్యాప్‌ 1.74 శాతం చొప్పున పెరిగాయి. మెటల్‌, రియల్టీ, ఆయిల్‌ అండ్‌ గ్యాస్‌, సిమెంట్‌, కెమికల్‌ రంగాల సూచీల్లో కొనుగోళ్లు కనిపించాయి. మరోవైపు నిఫ్టీ ఐటీ సూచీ అత్యధికంగా నష్టపోయింది.

ముడిచమురు ధరలు తగ్గడం, అంతర్జాతీయ బాండ్‌ ఈల్డ్స్‌లో మార్పులు మార్కెట్‌ సెంటిమెంట్‌కు మద్దతిచ్చాయని నిపుణులు తెలిపారు. భౌగోళిక ఉద్రిక్తతలపై ఆందోళనలు కొనసాగుతున్నప్పటికీ.. ప్రధాన కేంద్ర బ్యాంకుల అంచనా వేసిన విధాన నిర్ణయాలు కూడా ఇన్వెస్టర్ల సెంటిమెంట్‌కు కొంత ఊతమిచ్చాయని పేర్కొన్నారు.