జయశంకర్ వర్సిటీలో చెట్ల తొలగింపుపై దుమారం.. క్లారిటీ ఇచ్చిన అధికారులు

ముఖ్యమంత్రి రేవంత్ రెడ్డి పాల్గొననున్న కార్యక్రమానికి కొద్ది గంటల ముందు హైదరాబాద్‌లోని ప్రొఫెసర్ జయశంకర్ వ్యవసాయ విశ్వవిద్యాలయం క్యాంపస్‌లో చెట్లను నరికివేయడం తీవ్ర వివాదానికి దారితీసింది. వన మహోత్సవం కోసం కొత్త మొక్కలు నాటడానికి ఉన్న చెట్లను కూల్చివేయడమేమిటని విద్యార్థులు ప్రశ్నించారు. ఈ ఘటనకు సంబంధించిన వీడియోలు సోషల్ మీడియాలో వైరల్ కావడంతో దుమారం రేగింది. అయితే, ఈ ఆరోపణలపై యూనివర్సిటీ అధికారులు స్పష్టతనిచ్చారు.

శనివారం రాత్రి భారీ యంత్రాలతో క్యాంపస్‌లోని చెట్లను తొలగించడంపై కొందరు విద్యార్థులు అభ్యంతరం వ్యక్తం చేశారు. సోమవారం ముఖ్యమంత్రి చేతుల మీదుగా వన మహోత్సవం జరగనుండగా, ఇలా చెట్లను కూల్చివేయడం సరికాదని వారు ఆందోళన వ్యక్తం చేశారు. దీనిపై స్పందించిన యూనివర్సిటీ వైస్-ఛాన్సలర్ ప్రొఫెసర్ అల్దాస్ జనయ్య, సోషల్ మీడియాలో వస్తున్న వార్తలు అవాస్తవమని కొట్టిపారేశారు. పర్యావరణానికి హాని కలిగించే చెట్లను మాత్రమే తొలగిస్తున్నామని ఆయన వివరించారు.

క్యాంపస్‌లోని 150 ఎకరాల్లో ఉన్న సుబాబుల్, యూకలిప్టస్ చెట్లు భూగర్భ జలాలను విపరీతంగా తగ్గించి, నేల ఆరోగ్యాన్ని దెబ్బతీస్తున్నాయని వీసీ తెలిపారు. నిపుణుల సూచన మేరకే ఈ చెట్లను తొలగించే ప్రక్రియను గత నెల రోజులుగా చేపడుతున్నామని స్పష్టం చేశారు. ఈ చెట్లను తొలగించడానికి మే నెలలోనే ఐటీసీ సంస్థకు అధికారికంగా వేలంలో అప్పగించినట్లు ఆయన వెల్లడించారు. ఈ తొలగింపు ప్రక్రియలో హైదరాబాద్ మెట్రోపాలిటన్ డెవలప్‌మెంట్ అథారిటీ (హెచ్‌ఎండీఏ) కూడా భాగస్వామిగా ఉందని చెప్పారు.

ఈ చెట్ల స్థానంలో తెలంగాణకు చెందిన అరుదైన, సాంప్రదాయ అటవీ జాతి మొక్కలను పెద్ద ఎత్తున నాటనున్నట్లు వీసీ వివరించారు. దశాబ్దాలుగా సుబాబుల్, యూకలిప్టస్ చెట్ల కారణంగా దెబ్బతిన్న యూనివర్సిటీ బొటానికల్ గార్డెన్‌కు పునరుజ్జీవం కల్పించడమే తమ లక్ష్యమని ఆయన పేర్కొన్నారు. సుమారు 30 రకాల స్థానిక కలప, అడవి పండ్లు, పూల మొక్కలతో పాటు వివిధ రకాల వెదురు మొక్కలను నాటి క్యాంపస్‌ను పచ్చదనంతో నింపుతామని తెలిపారు.