దేశీయ ఆటోమొబైల్ రంగంలో ఒకప్పుడు తిరుగులేని ఆధిపత్యం చెలాయించిన మారుతి సుజుకీ ఇండియా పట్టు నెమ్మదిగా సడలుతోంది. 2026 ఆర్థిక సంవత్సరంలో కంపెనీ మార్కెట్ వాటా 13 ఏళ్ల కనిష్ఠ స్థాయి అయిన 39.26 శాతానికి పడిపోయింది. సొసైటీ ఆఫ్ ఇండియన్ ఆటోమొబైల్ మాన్యుఫ్యాక్చరర్స్ (SIAM) విడుదల చేసిన తాజా గణాంకాలు ఈ విషయాన్ని వెల్లడించాయి. మారుతి సుజుకీ మార్కెట్ వాటా తగ్గడం ఇది వరుసగా మూడో ఏడాది కావడం గమనార్హం.

ఒకప్పుడు దేశీయ ప్యాసింజర్ వాహనాల మార్కెట్‌లో దాదాపు సగం వాటాను కలిగి ఉన్న మారుతి, గత మూడేళ్లలో గణనీయంగా వెనుకబడింది. ముఖ్యంగా వేగంగా వృద్ధి చెందుతున్న స్పోర్ట్స్ యుటిలిటీ వెహికల్ (ఎస్‍యూవీ) సెగ్మెంట్‌లో కంపెనీ ఆశించిన స్థాయిలో రాణించలేకపోవడమే ఈ క్షీణతకు ప్రధాన కారణంగా కనిపిస్తోంది. ప్రస్తుతం దేశీయ ప్యాసింజర్ వాహనాల మార్కెట్‌లో ఎస్‍యూవీల వాటా 67 శాతానికి చేరగా, ఈ విభాగంలో మారుతీ వాటా 25 శాతం లోపే ఉండటం గమనార్హం. జిమ్నీ, విక్టోరిస్ వంటి కొత్త మోడళ్లను విడుదల చేసినా ఆశించిన ఫలితాలు రాలేదు.

మరోవైపు, వ్యాగనార్, స్విఫ్ట్, బాలెనో వంటి మోడళ్లతో చిన్న కార్ల (సబ్-4 మీటర్) సెగ్మెంట్‌లో మారుతి 67 శాతం వాటాతో తన ఆధిపత్యాన్ని కొనసాగిస్తోంది. అయితే, ఈ విభాగంలో వృద్ధి రేటు కేవలం 2 శాతం లోపే ఉండగా, ఎస్‍యూవీ సెగ్మెంట్ 11 శాతం వృద్ధిని నమోదు చేసింది.

ఇదిలా ఉండగా, ఇటీవల కంపెనీకి ఆదాయపు పన్ను శాఖ నుంచి రూ. 5,786 కోట్ల డిమాండ్‌తో డ్రాఫ్ట్ అసెస్‌మెంట్ ఆర్డర్ అందింది. అయితే, ఈ నోటీసు వల్ల తమ ఆర్థిక లేదా కార్యకలాపాల పనితీరుపై ఎలాంటి ప్రభావం ఉండదని కంపెనీ స్పష్టం చేసింది. నిబంధనల ప్రకారం డిస్ప్యూట్ రిజల్యూషన్ ప్యానెల్ ముందు తమ అభ్యంతరాలను దాఖలు చేస్తామని రెగ్యులేటరీ ఫైలింగ్‌లో పేర్కొంది.