బంగ్లాదేశ్‌తో జరగనున్న రెండు మ్యాచ్‌ల టెస్ట్ సిరీస్ కోసం పాకిస్థాన్ క్రికెట్ బోర్డు 16 మంది సభ్యులతో కూడిన జట్టును ప్రకటించింది. షాన్ మసూద్ కెప్టెన్‌గా వ్యవహరించనున్న ఈ జట్టులో నలుగురు కొత్త ఆటగాళ్లకు తొలిసారిగా అవకాశం కల్పించారు. ఐసీసీ వరల్డ్ టెస్ట్ ఛాంపియన్‌షిప్‌లో భాగంగా ఈ సిరీస్ జరగనుంది.

దేశవాళీ క్రికెట్‌లో నిలకడగా రాణిస్తున్న అబ్దుల్లా ఫజల్, అజాన్ అవైస్ అనే ఇద్దరు లెఫ్ట్ హ్యాండ్ బ్యాటర్లతో పాటు బౌలింగ్ ఆల్‌రౌండర్ అమాద్ బట్, వికెట్ కీపర్-బ్యాటర్ ఘాజీ ఘోరీలకు తొలిసారిగా టెస్ట్ జట్టులో చోటు దక్కింది. యువ ఆటగాళ్లకు అవకాశం ఇస్తూనే, బాబర్ ఆజం, మహమ్మద్ రిజ్వాన్, షాహీన్ షా అఫ్రిది వంటి సీనియర్లకు జట్టులో స్థానం కల్పించి సమతూకం పాటించారు.

ఈ పర్యటన కోసం పాకిస్థాన్ కొత్త కోచింగ్ బృందాన్ని కూడా నియమించింది. మాజీ కెప్టెన్ సర్ఫరాజ్ అహ్మద్‌ను హెడ్ కోచ్‌గా, అసద్ షఫీక్‌ను బ్యాటింగ్ కోచ్‌గా, ఉమర్ గుల్‌ను బౌలింగ్ కోచ్‌గా ఎంపిక చేసింది. ప్రస్తుతం వరల్డ్ టెస్ట్ ఛాంపియన్‌షిప్ పట్టికలో పాకిస్థాన్ 5వ స్థానంలో ఉండగా, బంగ్లాదేశ్ 8వ స్థానంలో ఉంది. ఈ సిరీస్ గెలిచి తమ స్థానాన్ని మెరుగుపరుచుకోవాలని పాక్ భావిస్తోంది.

ఈ సిరీస్‌కు ముందు పాకిస్థాన్ సూపర్ లీగ్‌లో పాల్గొనని ఆటగాళ్ల కోసం ఏప్రిల్ 27 నుంచి మే 1 వరకు కరాచీలో ప్రత్యేక శిక్షణా శిబిరం నిర్వహించనున్నారు. 

సిరీస్ షెడ్యూల్:
మొదటి టెస్ట్: మే 8 - 12, షేర్-ఎ-బంగ్లా నేషనల్ క్రికెట్ స్టేడియం, ఢాకా
రెండో టెస్ట్: మే 16 - 20, సిల్హెట్ ఇంటర్నేషనల్ క్రికెట్ స్టేడియం, సిల్హెట్

పాకిస్థాన్ జట్టు: షాన్ మసూద్ (కెప్టెన్), అబ్దుల్లా ఫజల్, అమాద్ బట్, అజాన్ అవాయిస్, బాబర్ ఆజం, హసన్ అలీ, ఇమామ్-ఉల్-హక్, ఖుర్రం షాజాద్, మహమ్మద్ అబ్బాస్, మహమ్మద్ రిజ్వాన్, ఘాజీ ఘోరీ, నొమాన్ అలీ, సాజిద్ ఖాన్, సల్మాన్ అలీ అఘా, సౌద్ షకీల్, షహీన్ షా అఫ్రిది.