పశ్చిమాసియా సంక్షోభం నేపథ్యంలో టెక్ దిగ్గజం మైక్రోసాఫ్ట్ జాతీయ భద్రతా సంస్థలతో చేసుకునే కాంట్రాక్టుల విషయంలో కీలక నిర్ణయం తీసుకుంది. ఇకపై మానవ హక్కుల పరిశీలన, సెక్యూరిటీ నిబంధనలను మరింత కఠినతరం చేయనున్నట్లు ప్రకటించింది. ఇజ్రాయెల్ సైన్యం తమ అజూర్ క్లౌడ్ ప్లాట్‌ఫామ్‌ను నిఘా కార్యకలాపాలకు వినియోగించడంపై జరిపిన అంతర్గత విచారణ అనంతరం ఈ నిర్ణయం వెలువడింది.

కొత్త మార్గదర్శకాల ప్రకారం, జాతీయ భద్రతకు సంబంధించిన ప్రాజెక్టులకు ఇచ్చే ముందస్తు ఆమోదాలను కట్టుదిట్టం చేయనున్నారు. మారుతున్న రాజకీయ పరిస్థితులకు అనుగుణంగా తమ సేవల వినియోగాన్ని ఎప్పటికప్పుడు సమీక్షిస్తారు. ముఖ్యంగా, వివాదాస్పద, ప్రమాదకర ప్రాంతాల్లో మానవ హక్కుల ఉల్లంఘన జరగకుండా కఠినమైన అంచనాలను అమలు చేస్తారు. అలాగే, తమ ఉద్యోగులకు విదేశీ ప్రభుత్వాలు జారీ చేసే సెక్యూరిటీ క్లియరెన్స్‌ల నిర్వహణ ప్రక్రియలను కూడా సమీక్షించనున్నట్లు కంపెనీ తెలిపింది.

గత ఏడాది గార్డియన్ పత్రికతో పాటు ఇజ్రాయెల్‌కు చెందిన కొన్ని మీడియా సంస్థలు సంచలన కథనాలను ప్రచురించాయి. ఇజ్రాయెల్ సైనిక విభాగం 'యూనిట్ 8200', రోజూ లక్షలాది మంది పాలస్తీనియన్ల ఫోన్ కాల్స్‌ను అడ్డగించి, వాటిని విశ్లేషించేందుకు మైక్రోసాఫ్ట్ అజూర్‌ను వాడుకున్నట్లు ఈ కథనాలు వెల్లడించాయి. ఈ ఆరోపణలపై విచారణ జరిపిన మైక్రోసాఫ్ట్, తమ సేవా నిబంధనలను ఉల్లంఘించినట్లు నిర్ధారించి, కొన్ని క్లౌడ్, ఏఐ సేవలకు యాక్సెస్‌ను రద్దు చేసింది. ఈ నిఘా కార్యకలాపాల గురించి సీఈఓ సత్య నాదెళ్లతో సహా ఉన్నత యాజమాన్యానికి తెలియదని సమాచారం.

మానవ హక్కుల పాలనను మరింత సమర్థవంతంగా మార్చేందుకే ఈ సిఫార్సులు చేశామని మైక్రోసాఫ్ట్ తమ విచారణ సారాంశంలో పేర్కొంది. ఐక్యరాజ్యసమితి మార్గదర్శకాలకు కట్టుబడి ఉన్నామని, సామాన్య పౌరులపై సామూహిక నిఘాకు ఉద్దేశించిన టెక్నాలజీని తాము అందించబోమని స్పష్టం చేసింది.