థాయ్‌లాండ్‌లోని ప్రముఖ పర్యాటక నగరం పట్టాయాలో పోలీసులు అప్రమత్తమయ్యారు. అమెరికా నేవీకి చెందిన దాదాపు 5 వేల మంది నావికులు, మెరైన్లు నగరానికి రానుండటంతో నిఘా పెంచారు. ముఖ్యంగా బీచ్‌, నైట్‌లైఫ్‌ ప్రాంతాల్లో అదనపు గస్తీ ఏర్పాటు చేశారు. వ్యభిచారాన్ని అడ్డుకునేందుకు ఇప్పటికే తనిఖీలు మొదలయ్యాయి. 

అమెరికా విమాన వాహక నౌక యూఎస్‌ఎస్‌ అబ్రహం లింకన్‌ బుధవారం థాయ్‌లాండ్‌లోని లామ్‌ చబాంగ్‌ పోర్టుకు చేరుకుంది. దానితో పాటు మరో రెండు అమెరికా నేవీ నౌకలు కూడా వచ్చాయి. నౌకలో ఉన్న సిబ్బందికి ఐదు రోజుల పాటు విశ్రాంతి, వినోదం కోసం ఒడ్డుకు వచ్చే అవకాశం కల్పించారు. 

అమెరికా సిబ్బంది రాకకు ముందే పట్టాయాలో పోలీసులు దాడులు నిర్వహించారు. వారాంతంలో జరిగిన తనిఖీల్లో వ్యభిచారానికి పాల్పడుతున్నారనే అనుమానంతో 40 నుంచి 50 మందిని అదుపులోకి తీసుకున్నారు. నగరంలోని బీచ్‌, నైట్‌లైఫ్‌ ప్రాంతాల్లో మరింత కఠినంగా నిఘా పెట్టనున్నట్లు అధికారులు తెలిపారు. 

మరోవైపు వేలాది మంది అమెరికా సిబ్బంది రాకతో పట్టాయా వ్యాపారాలకు ఊతం లభించొచ్చని అధికారులు భావిస్తున్నారు. ఒక్కో సిబ్బంది రోజుకు 1,000 నుంచి 3,000 భాట్‌ వరకు ఖర్చు చేసే అవకాశం ఉందని పట్టాయా మేయర్‌ పొరమాస్‌  తెలిపారు. హోటళ్లు, రెస్టారెంట్లు, బార్లు, దుకాణాలకు దీనివల్ల ప్రయోజనం కలగొచ్చని చెప్పారు. 

సుదీర్ఘ కాలంగా అబ్రహం లింకన్‌ నౌకను సముద్రంలో మోహరించారు. 200 రోజులకు పైగా సముద్రంలో ఉన్న దీన్ని మధ్యప్రాచ్యానికి మళ్లించారు. ఇంత సుదీర్ఘంగా సముద్రంలో ఉండటంతో సిబ్బంది మానసిక ఆరోగ్యం, నౌకలో పరిస్థితులపై ఆందోళనలు వ్యక్తమయ్యాయి.