రష్యా పార్లమెంట్ ఎన్నికల చివరి రోజున ఉక్రెయిన్ దళాలు మాస్కోపై భీకర డ్రోన్, క్షిపణి దాడికి పాల్పడ్డాయి. ఈ దాడిలో కీలకమైన చమురు శుద్ధి కర్మాగారం దెబ్బతినడంతో పాటు ముగ్గురు పౌరులు మరణించారు. యుద్ధం మొదలైనప్పటి నుంచి మాస్కో ప్రాంతంపై ఇదే అతిపెద్ద దాడిగా రష్యా అధికారులు పేర్కొన్నారు.

శనివారం అర్ధరాత్రి మొదలైన ఈ దాడిలో ఉక్రెయిన్ వేలాది డ్రోన్లను ప్రయోగించినట్లు తెలుస్తోంది. వీటిలో 1,100కు పైగా డ్రోన్లను కూల్చివేశామని రష్యా రక్షణ శాఖ ప్రకటించింది. అయితే, 1,600 డ్రోన్లను అడ్డుకున్నామని మాస్కో మేయర్ సెర్గీ సోబ్యానిన్ తెలిపారు. ఈ దాడిలో గాజ్‌ప్రామ్‌కు చెందిన కపోట్న్యా చమురు శుద్ధి కర్మాగారంలో మంటలు చెలరేగాయి. 20 మందికి పైగా గాయపడగా, సోఫినోలోని ఓ లాజిస్టిక్స్ కేంద్రం, నివాస భవనాలు కూడా దెబ్బతిన్నాయి. భద్రతా కారణాల రీత్యా మాస్కోలోని నాలుగు విమానాశ్రయాల్లో విమానాల రాకపోకలపై తాత్కాలికంగా ఆంక్షలు విధించారు.ఎన్నికలకు అంతరాయం కలిగించేందుకే ఉక్రెయిన్ ఈ దాడికి పాల్పడిందని మాస్కో మేయర్ ఆరోపించారు.

మరోవైపు, ఈ దాడిని ఉక్రెయిన్ అధ్యక్షుడు వోలోదిమిర్ జెలెన్‌స్కీ ధ్రువీకరించారు. రష్యా యుద్ధ యంత్రాంగానికి నిధులు సమకూర్చే కీలకమైన చమురు శుద్ధి కర్మాగారం, లాజిస్టిక్స్ కేంద్రాన్ని లక్ష్యంగా చేసుకున్నామని ఆయన స్పష్టం చేశారు. ఈ దాడిలో స్వదేశీ పరిజ్ఞానంతో తయారుచేసిన ఫ్లెమింగో, పాలియానిట్సియా, పెలికాన్ వంటి క్షిపణులను కూడా ఉపయోగించినట్లు తెలిపారు.

ఈ దాడులకు ప్రతీకారంగా రష్యా కూడా ఉక్రెయిన్‌పై దాడులను కొనసాగించింది. కీవ్, సుమీ ప్రాంతాలపై రష్యా జరిపిన దాడుల్లో చిన్నారులతో సహా పలువురు మృతి చెందినట్లు ఉక్రెయిన్ అధికారులు వెల్లడించారు. ఇరుపక్షాలు పౌర, మౌలిక సదుపాయాలను లక్ష్యంగా చేసుకోవడంతో యుద్ధ తీవ్రత మరింత పెరుగుతోంది.