దేశ రియల్ ఎస్టేట్ రంగంలో ఓ భారీ లావాదేవీ నమోదైంది. ప్రముఖ పారిశ్రామికవేత్త మానవ్ సర్దానా గురుగ్రామ్‌లోని డీఎల్ఎఫ్ సంస్థకు చెందిన అల్ట్రా-లగ్జరీ ప్రాజెక్టు 'ది డాలియాస్'లో ఏకంగా రూ. 271 కోట్లకు ఒక పెంట్‌హౌస్‌ను కొనుగోలు చేశారు. దేశంలో ఇప్పటివరకు నమోదైన అత్యంత ఖరీదైన సింగిల్-హోమ్ ప్రాపర్టీ లావాదేవీలలో ఇది ఒకటిగా నిలిచింది. ఈ డీల్‌తో గురుగ్రామ్‌లోని విలాసవంతమైన గృహాల మార్కెట్ మరోసారి వార్తల్లోకి ఎక్కింది.

గోల్ఫ్ కోర్స్ రోడ్‌లోని సెక్టార్ 54లో ఉన్న ఈ పెంట్‌హౌస్ సూపర్ ఏరియా సుమారు 17,200 చదరపు అడుగులు కాగా, కార్పెట్ ఏరియా దాదాపు 10,500 చదరపు అడుగులుగా ఉంది. ఈ డీల్ విలువ ప్రకారం.. సూపర్ ఏరియా లెక్కన చదరపు అడుగుకు రూ. 1.58 లక్షలు, కార్పెట్ ఏరియా ప్రకారం చదరపు అడుగుకు రూ. 2.6 లక్షల రికార్డు ధర పలికినట్లు తెలుస్తోంది.

ఎవరీ మానవ్ సర్దానా?
వంద సంవత్సరాలకు పైగా వ్యాపార చరిత్ర కలిగిన ఢిల్లీ-ఎన్‌సీఆర్ ప్రాంతానికి చెందిన సర్దానా కుటుంబానికి చెందిన వ్యక్తి మానవ్ సర్దానా. ఆయన తండ్రి ఎస్‌బీ సర్దానా 1969లో స్థాపించిన 'ఇంపీరియల్ ఆటో ఇండస్ట్రీస్' సంస్థతో ఈ కుటుంబం ప్రసిద్ధి చెందింది. ఆటోమొబైల్ రంగానికి అవసరమైన పరికరాలను తయారు చేసే ఈ సంస్థ దేశంలోనే ప్రధాన ప్లేయర్‌గా ఎదిగింది. గ్లోబల్ ప్రైవేట్ ఈక్విటీ సంస్థ వార్‌బర్గ్ పింకస్ దీనిని కొనుగోలు చేయడానికి ముందు మానవ్ సర్దానా ఇంపీరియల్ ఆటోతో అనుబంధం కలిగి ఉన్నారు. ప్రస్తుతం ఆయన గ్రూపునకు చెందిన డజనుకు పైగా కంపెనీలలో డైరెక్టర్‌గా కొనసాగుతున్నారు.

'ది డాలియాస్' ప్రాజెక్టు విశేషాలు
డీఎల్ఎఫ్ సంస్థ 2024 అక్టోబర్‌లో 'ది డాలియాస్' ప్రాజెక్టును ప్రారంభించింది. గురుగ్రామ్‌లోని డీఎల్ఎఫ్ ఫేజ్ 5లో 17 ఎకరాల విస్తీర్ణంలో దీనిని నిర్మిస్తోంది. ఇందులో దాదాపు 420 అపార్ట్‌మెంట్లు, పెంట్‌హౌస్‌లు ఉన్నాయి. ఒక్కో అపార్ట్‌మెంట్ ధర రూ. 100 కోట్ల నుంచి రూ. 170 కోట్ల మధ్య ఉండగా, పెంట్‌హౌస్‌ల ధరలు మరింత అధికంగా ఉన్నాయి. ఈ ప్రాజెక్టు ద్వారా రూ. 40,000 కోట్లకు పైగా ఆదాయం వస్తుందని డీఎల్ఎఫ్ అంచనా వేస్తోంది. పీటీఐ కథనం ప్రకారం, ఇప్పటికే 65% యూనిట్లు అమ్ముడయ్యాయి.

కరోనా మహమ్మారి తర్వాత దేశంలోని ప్రధాన నగరాలైన గురుగ్రామ్, ముంబైలలో విలాసవంతమైన గృహాలకు డిమాండ్ విపరీతంగా పెరిగింది. సంపన్న కొనుగోలుదారులు పెద్ద, ప్రత్యేకమైన ఇళ్లను కోరుకుంటున్నారని ఈ భారీ డీల్ స్పష్టం చేస్తోంది.