తెలంగాణలో తమ రాజకీయ కార్యకలాపాలను విస్తరించే దిశగా జనసేన పార్టీ కీలక అడుగులు వేస్తోంది. రానున్న గ్రేటర్ హైదరాబాద్ మున్సిపల్ కార్పొరేషన్ (జీహెచ్ఎంసీ), మల్కాజిగిరి మున్సిపల్ కార్పొరేషన్ (ఎంఎంసీ), సైబరాబాద్ మున్సిపల్ కార్పొరేషన్ (సీఎంసీ) ఎన్నికల్లో తమ పార్టీ బలంగా పోటీ చేస్తుందని జనసేన స్పష్టం చేసింది. ఈ మేరకు పార్టీ ప్రధాన కార్యదర్శి శ్రీ తాళ్లూరి రామ్ అధికారికంగా ప్రకటన చేశారు.

నిన్న‌ హైదరాబాద్‌లోని జనసేన తెలంగాణ రాష్ట్ర కార్యాలయంలో మూడు కార్పొరేషన్ల పరిధిలోని ముఖ్య నేతలతో విస్తృత స్థాయి సమావేశం జరిగింది. ఈ సందర్భంగా తాళ్లూరి రామ్ మాట్లాడుతూ.. "రానున్న కార్పొరేషన్ ఎన్నికల్లో పోటీకి జనసేన శ్రేణులు సిద్ధం కావాలి. పార్టీ చేపడుతున్న కార్యక్రమాలను ప్రజల్లోకి బలంగా తీసుకెళ్లాలి" అని దిశానిర్దేశం చేశారు. ఎన్నికల్లో గెలుపే లక్ష్యంగా క్షేత్రస్థాయిలో పనిచేయాలని ఆయన పిలుపునిచ్చారు.

జనసేన తెలంగాణ రాష్ట్ర ఇన్‌ఛార్జ్ నేమూరి శంకర్ గౌడ్ మాట్లాడుతూ.. పార్టీ ఆవిర్భావం నుంచి కష్టపడి పనిచేసిన ప్రతి ఒక్కరికీ తగిన గుర్తింపు ఉంటుందని హామీ ఇచ్చారు. పోటీ చేసే అభ్యర్థులు ప్రజలతో మమేకమై వారి సమస్యల పరిష్కారానికి కృషి చేయాలని సూచించారు. పార్టీ ప్రచార కార్యదర్శి సాగర్ ఆర్.కె. నాయుడు మాట్లాడుతూ.. ఈ ఎన్నికల ఫలితాలు తెలంగాణ రాజకీయ భవిష్యత్తుకు దిక్సూచిగా నిలుస్తాయని అభిప్రాయపడ్డారు.

ఇటీవల వరంగల్-ఖమ్మం-నల్గొండ పట్టభద్రుల ఎమ్మెల్సీ అభ్యర్థిగా మాజీ హెల్త్ డైరెక్టర్ డాక్టర్ గడల శ్రీనివాసరావు పేరును జనసేన ప్రకటించిన విషయం తెలిసిందే. ఇప్పుడు గ్రేటర్ ఎన్నికల బరిలోకి దిగుతున్నట్లు ప్రకటించడంతో తెలంగాణలో పార్టీని బలోపేతం చేయడంపై జనసేన అధిష్ఠానం సీరియస్‌గా దృష్టి సారించినట్లు స్పష్టమవుతోంది. ఈ సమావేశంలో రాష్ట్ర నాయకులు రాధారం రాజలింగం, మచ్చ సుధాకర్, ముమ్మారెడ్డి ప్రేమ్ కుమార్, గడల శ్రీనివాస్‌తో పాటు పలువురు ఆశావహులు పాల్గొన్నారు.

ప్రస్తుతం కొనసాగుతున్న సర్వే ప్రక్రియ పూర్తయిన తర్వాత ఈ ఏడాది డిసెంబర్‌లో జీహెచ్ఎంసీ ఎన్నికలు నిర్వహించేందుకు ప్రభుత్వం సన్నాహాలు చేస్తోంది. అధికార కాంగ్రెస్‌తో పాటు బీఆర్ఎస్, బీజేపీ, ఎంఐఎం వంటి బలమైన పార్టీలు బరిలో ఉండగా, ఇప్పుడు జనసేన కూడా పోటీలోకి దిగుతుండటంతో గ్రేటర్ పోరు మరింత రసవత్తరంగా మారనుంది.