రష్యాలోని ఓ ఎలక్ట్రానిక్స్ స్టోర్‌లో జరిగిన ఓ వింత ఘటన ఇప్పుడు సోషల్ మీడియాను షేక్ చేస్తోంది. ఓ కస్టమర్ తనను నెట్టడంతో ఓ హ్యూమనాయిడ్ రోబో ఎదురుతిరిగింది. ఏకంగా ఆ కస్టమర్‌ను కాలుతో తన్నేందుకు ప్రయత్నించినట్లు ఉన్న వీడియో ఒకటి నెట్టింట వైరల్‌గా మారింది. "యంత్రాలు తిరగబడుతున్నాయా?" అంటూ ఈ వీడియోపై నెటిజన్లు సరదాగా చర్చించుకుంటున్నారు.

వివరాల్లోకి వెళితే.. రష్యాలోని ఓ ఎలక్ట్రానిక్స్ స్టోర్‌లో ప్రదర్శనకు ఉంచిన హ్యూమనాయిడ్ రోబో దగ్గరకు ఓ వ్యక్తి వచ్చాడు. నల్ల టీ-షర్ట్ ధరించిన ఆ కస్టమర్, కావాలనే ఆ రోబోను గట్టిగా నెట్టాడు. ఊహించని విధంగా, ఆ రోబో వెంటనే స్పందించింది. తన కాలును పైకెత్తి ఆ వ్యక్తిని తన్నేందుకు ప్రయత్నించినట్లు వీడియోలో స్పష్టంగా కనిపించింది. ఆ తర్వాత కూడా రోబో కదులుతూ ఉండటంతో, సిబ్బంది దాన్ని పవర్ ఆఫ్ చేసినట్లు సమాచారం.

ఈ వీడియో మొదట 'ఎక్స్‌' (ట్విట్టర్)లో పోస్ట్ అవ్వగా, క్షణాల్లో వైరల్‌గా మారింది. సైన్స్ ఫిక్షన్ సినిమాల్లో చూపించినట్లు రోబోలు ఎదురుతిరుగుతున్నాయంటూ కొందరు కామెంట్లు చేశారు. "రోబోకు కూడా ఆత్మాభిమానం ఉంటుంది" అని కొందరు సరదాగా వ్యాఖ్యానించగా, మరికొందరు మాత్రం ఇలాంటి స్వతంత్ర రోబోలను జనాల మధ్య ఉంచడంపై ఆందోళన వ్యక్తం చేశారు. ఇది చూడ్డానికి ఫన్నీగా ఉన్నా, భవిష్యత్తులో ప్రమాదాలకు దారితీయవచ్చని అభిప్రాయపడ్డారు.

అయితే, ఈ వీడియోలో కనిపించిన రోబో స్పందన నిజంగా స్వతంత్రంగా జరిగిందా? లేక ఎవరైనా రిమోట్‌తో ఆపరేట్ చేశారా? అనే దానిపై స్పష్టత లేదు. కొన్ని వార్తా సంస్థలు ఈ ఘటనపై అధికారికంగా ఎలాంటి ధ్రువీకరణ లేదని పేర్కొన్నాయి. ఆ స్టోర్ యాజమాన్యం గానీ, రోబో తయారీదారులు గానీ ఇప్పటివరకు దీనిపై ఎలాంటి ప్రకటన చేయలేదు. ఇటీవల కాలంలో మనుషులతో రోబోలు వింతగా ప్రవర్తిస్తున్న ఘటనలు తరచూ వెలుగులోకి వస్తున్న నేపథ్యంలో ఈ తాజా సంఘటన టెక్నాలజీ వర్గాల్లో కొత్త చర్చకు దారితీసింది.