బాలీవుడ్ మెగాస్టార్ అమితాబ్ బచ్చన్, ప్రముఖ గాయకుడు, నటుడు దిల్జిత్ దొసాంజ్‌ల‌ను లక్ష్యంగా చేసుకుని వచ్చిన ఓ బెదిరింపు ఈమెయిల్ ముంబైలో తీవ్ర కలకలం రేపింది. అమితాబ్ నివాసంపై గ్రెనేడ్ దాడికి, దిల్జిత్ సంగీత కచేరీలో ఆత్మాహుతి దాడికి పాల్పడతామంటూ ఆగంతకులు హెచ్చరించడంతో ముంబై పోలీసులు అప్రమత్తమయ్యారు. ఈ ఘటనపై సమగ్ర దర్యాప్తు ప్రారంభించారు.

'బృహన్‌ ముంబై మున్సిపల్ కార్పొరేషన్' (బీఎంసీ) కార్యాలయంతో పాటు ముంబై మేయర్ రీతూ తవ్డే కార్యాలయానికి ఈ బెదిరింపు ఈమెయిల్ వచ్చింది. స్మిత్ జాన్సన్ అనే పేరుతో పంపిన ఈ మెయిల్‌కు ఖలిస్థాన్ అనే పదాన్ని సబ్జెక్టుగా పెట్టారు. ఇందులో జుహూలోని అమితాబ్ బచ్చన్ నివాసం 'జల్సా'పై గ్రెనేడ్లతో దాడి చేస్తామని పేర్కొన్నారు. అంతేకాకుండా నవంబర్ 27న మహాలక్ష్మి రేస్‌కోర్స్‌లో జరగనున్న దిల్జిత్ సంగీత కచేరీలో ఆత్మాహుతి దాడికి పాల్పడతామని హెచ్చరించారు. ఈ రెండు ప్రదేశాలతో పాటు కొన్ని పాఠశాలలు, మేయర్ కార్యాలయాన్ని కూడా టార్గెట్ చేస్తామని ఆ మెయిల్‌లో ఉంది.

ఈమెయిల్ అందుకున్న వెంటనే అధికారులు పోలీసులకు సమాచారం అందించారు. దీంతో రంగంలోకి దిగిన పోలీసులు, బాంబ్ స్క్వాడ్ బృందాలు అమితాబ్ నివాసం వద్ద, కచేరీ జరగాల్సిన ప్రదేశంలో విస్తృతంగా తనిఖీలు చేపట్టాయి. అయితే, తనిఖీల్లో ఎటువంటి అనుమానాస్పద వస్తువులు లభించలేదని అధికారులు తెలిపారు. అయినప్పటికీ, దీనిని తీవ్రంగా పరిగణించిన పోలీసులు భద్రతను కట్టుదిట్టం చేశారు.

ఇటీవల అక్టోబర్ 30న ఢిల్లీలోని జవహర్‌లాల్ నెహ్రూ స్టేడియంలో జరగాల్సిన దిల్జిత్ కచేరీకి భద్రతా కారణాల దృష్ట్యా ఢిల్లీ పోలీసులు అనుమతి నిరాకరించిన విషయం తెలిసిందే. ఆ ఘటన జరిగిన కొద్ది రోజులకే ముంబైలో ఇలాంటి బెదిరింపు రావడం ఆందోళన కలిగిస్తోంది. ఈ ఈమెయిల్ ఎక్కడి నుంచి వచ్చింది? దీని వెనుక ఉన్నది ఎవరు? అనే కోణంలో పోలీసులు దర్యాప్తు చేస్తున్నారు. ఇది నిజమైన బెదిరింపా? లేక ఆకతాయిల చర్యా? అనే విషయాన్ని తేల్చే పనిలో నిమగ్నమయ్యారు.