పదిహేడేళ్ల వయసులో తోటి విద్యార్థులు చదువు, ఆటలతో గడుపుతుంటే... దుబాయ్‌లో చదువుతున్న రెహాన్ చౌధరి అనే విద్యార్థి మాత్రం భారతీయ మహిళలకు ఆర్థిక అక్షరాస్యతను అందించే బృహత్కార్యానికి శ్రీకారం చుట్టాడు. 2025లో 'ది ప్రాస్పెరిటీ ప్రాజెక్ట్' అనే సంస్థను స్థాపించి, పశ్చిమ బెంగాల్, మహారాష్ట్ర రాష్ట్రాల్లోని 420 మంది మహిళలకు ఆర్థిక అంశాలపై అవగాహన కల్పించాడు. బడ్జెటింగ్, పొదుపు, అప్పులు, ఆర్థిక మోసాలను గుర్తించడం వంటి రోజువారీ అంశాలపై వర్క్‌షాప్‌లు నిర్వహిస్తున్నాడు.

పుట్టినప్పటి నుంచి తనను కంటికి రెప్పలా చూసుకున్న శంప అనే ఆయా, ఆమె కుటుంబం ఆర్థిక మోసానికి గురైన తీరు రెహాన్‌ను కదిలించింది. సరైన ఆర్థిక అవగాహన ఉంటే ప్రజలు తమ కష్టార్జితాన్ని కాపాడుకోవడమే కాకుండా, సరైన నిర్ణయాలు తీసుకోగలరని భావించాడు. ఈ ఆలోచనతోనే ఆచరణలోకి దిగాడు. 'నోయింగ్ యువర్ మనీ' పేరుతో పది మాడ్యూల్స్‌తో కూడిన ఒక పాఠ్యప్రణాళికను రూపొందించాడు. సామాన్యులకు సైతం అర్థమయ్యేలా ఉదాహరణలతో ఆర్థిక సూత్రాలను వివరిస్తున్నాడు.

"ప్రజలు తమ రోజువారీ జీవితంలో తీసుకునే నిర్ణయాలకు ఆర్థిక విద్యను ఆచరణాత్మకంగా మార్చాలనుకున్నాను. డబ్బు ఎలా పనిచేస్తుందో తెలుసుకోవడమే కాదు, సరైన ప్రశ్నలు అడగడం, నష్టాలను అర్థం చేసుకోవడం, సొంత డబ్బుపై సరైన నిర్ణయాలు తీసుకోవడం ముఖ్యం" అని రెహాన్ చౌధరి తెలిపారు.

ఈ ప్రాజెక్టులో భాగంగా పశ్చిమ బెంగాల్‌లోని బారుయ్‌పూర్, అసన్‌సోల్‌తో పాటు మహారాష్ట్రలోని కొల్హాపూర్‌లో వర్క్‌షాప్‌లు నిర్వహించారు. బంధన్-కొన్నగర్, బెంగాల్ సృష్టి ఇన్‌ఫ్రాస్ట్రక్చర్, ఇండో కౌంట్ వంటి సంస్థల సహకారంతో ఈ కార్యక్రమాన్ని విస్తరిస్తున్నారు. శిక్షణ పొందిన వారిలో నుంచి 40 మందిని 'కమ్యూనిటీ రిసోర్స్ పర్సన్స్' (సీఆర్‌పీ)గా ఎంపిక చేసి, వారి ద్వారా ఈ విద్యను మరింత మందికి చేరవేసేలా ప్రోత్సహిస్తున్నారు. హిందీ, ఇంగ్లీష్ భాషల్లో శిక్షణ ఇస్తుండగా, అవసరమైన చోట స్థానిక భాషల్లోకి అనువదించి వివరిస్తున్నారు. ఈ ప్రాజెక్ట్ ద్వారా మహిళల ఆర్థిక పరిజ్ఞానంలో వస్తున్న మార్పులను అంచనా వేయడానికి ప్రత్యేక వ్యవస్థను కూడా రెహాన్ అభివృద్ధి చేశాడు.