బీసీసీఐ స్వదేశంలో జరిగే మ్యాచ్‌లకు సంబంధించి కొత్త టైటిల్ స్పాన్సర్‌ను ఖరారు చేసింది. ప్రముఖ ఫైనాన్షియల్ సంస్థ ముత్తూట్ ఫిన్‌కార్ప్‌తో రాబోయే రెండేళ్ల హోమ్ సీజన్ల కోసం ఒప్పందం కుదుర్చుకుంది. వెస్టిండీస్‌తో స్వదేశీ సిరీస్ ప్రారంభానికి కేవలం రెండు రోజుల ముందు ఈ కీలక పరిణామం చోటుచేసుకుంది.

క్రిక్‌బజ్ నివేదిక ప్రకారం.. ఒక్కో మ్యాచ్‌కు రూ. 4.85 కోట్ల బేస్ ప్రైస్‌తో బీసీసీఐ ఈ డీల్‌ను ఖరారు చేసింది. అయితే, ఈ స్పాన్సర్‌షిప్ కోసం నిర్ణయించిన అధిక కనీస ధర కారణంగా ఇతర బిడ్డర్ల నుంచి పెద్దగా ఆసక్తి రాలేదని సమాచారం. దీంతో ముత్తూట్ ఫిన్‌కార్ప్ ఈ హక్కులను దక్కించుకుంది.

భారత్, వెస్టిండీస్ మధ్య ఈ నెల 27 నుంచి సిరీస్ ప్రారంభం కానుంది. ఈ పర్యటనలో ఇరు జట్ల మధ్య మూడు వన్డేలు, ఐదు టీ20లు జరగనున్నాయి. తిరువనంతపురంలోని గ్రీన్‌ఫీల్డ్ స్టేడియంలో తొలి వన్డే జరగనుండగా, సెప్టెంబర్ 30, అక్టోబర్ 3 తేదీల్లో మిగిలిన వన్డేలు జరుగుతాయి. 

అనంతరం అక్టోబర్ 6 నుంచి 17 వరకు టీ20 సిరీస్ జరగనుంది. ఇకపై స్వదేశంలో జరిగే అన్ని అంతర్జాతీయ మ్యాచ్‌లకు ముత్తూట్ ఫిన్‌కార్ప్ టైటిల్ స్పాన్సర్‌గా వ్యవహరించనుంది.