దేశంలో ప్రతిష్ఠాత్మకంగా చేపట్టిన ముంబై-అహ్మదాబాద్ హై-స్పీడ్ రైల్ (బుల్లెట్ ట్రైన్) ప్రాజెక్టు మరో కీలక మైలురాయిని అధిగమించింది. గుజరాత్‌లోని సబర్మతి నదిపై 480 మీటర్ల పొడవైన వంతెన నిర్మాణాన్ని నేషనల్ హై స్పీడ్ రైల్ కార్పొరేషన్ లిమిటెడ్ (ఎన్‌హెచ్ఎస్ఆర్‌సీఎల్) విజయవంతంగా పూర్తి చేసింది. అహ్మదాబాద్ ప్రాంతంలో ఇది అత్యంత ముఖ్యమైన నిర్మాణాల్లో ఒకటిగా నిలవనుంది.

ఈ వంతెన అహ్మదాబాద్, సబర్మతి బుల్లెట్ ట్రైన్ స్టేషన్ల మధ్య ఉంది. దీని పొడవు 480 మీటర్లు కాగా, ఎత్తు సుమారు 36 మీటర్లు. అంటే దాదాపు 12 అంతస్తుల భవనంతో సమానం. ప్రస్తుతం ఉన్న అహ్మదాబాద్-దిల్లీ రైల్వే లైన్‌కు ఎలాంటి ఆటంకం కలగకుండా, దానిపై నుంచి ఈ వంతెన నిర్మించారు. ఈ వంతెన నిర్మాణం కోసం మొత్తం 8 భారీ పియర్లను ఉపయోగించారు.

ఈ వంతెన నిర్మాణంలో ఆధునిక "బ్యాలెన్స్‌డ్ కాంటిలివర్ మెథడ్" అనే సాంకేతికతను వినియోగించారు. దీనివల్ల నదిలో ఎక్కువ పియర్లు నిర్మించాల్సిన అవసరం తగ్గింది. పొడవైన స్పాన్‌లతో (76 మీటర్లు) నిర్మాణం చేపట్టడం దీని ప్రత్యేకత. పియర్ల నుంచి ఇరువైపులా సమంగా సెగ్మెంట్లను జోడిస్తూ, ఎటువంటి సంప్రదాయ సపోర్టు లేకుండా ఈ వంతెనను నిర్మించారు.

మొత్తం ముంబై-అహ్మదాబాద్ బుల్లెట్ ట్రైన్ కారిడార్‌లో 25 నదులపై వంతెనలు నిర్మించాల్సి ఉండగా, వాటిలో 21 గుజరాత్‌లో ఉన్నాయి. తాజా వంతెనతో కలిపి గుజరాత్‌లో ఇప్పటివరకు 18 నదీ వంతెనల నిర్మాణం పూర్తయింది.