భారత మహిళల క్రికెట్ జట్టు యువ ఓపెనర్ షఫాలీ వర్మ సరికొత్త ప్రపంచ రికార్డు సృష్టించింది. జింబాబ్వేతో జరిగిన రెండో టీ20లో మెరుపు ఇన్నింగ్స్‌తో అదరగొట్టి, టీమిండియాకు ఘన విజయాన్ని అందించింది. ఈ విజయంతో భారత్ మూడు మ్యాచ్‌ల సిరీస్‌ను మరో మ్యాచ్ మిగిలి ఉండగానే 2-0 తేడాతో కైవసం చేసుకుంది.

రాయ్‌పూర్‌లో ఆదివారం జరిగిన ఈ మ్యాచ్‌లో షఫాలీ కేవలం 25 బంతుల్లో 6 ఫోర్లు, 4 భారీ సిక్సర్ల సాయంతో 55 పరుగులు చేసింది. ఈ క్రమంలో మహిళల టీ20ల్లో ఒకే క్యాలెండర్ ఇయర్‌లో అత్యధిక 50కిపైగా స్కోర్లు చేసిన క్రికెటర్‌గా చరిత్ర సృష్టించింది. 2026లో షఫాలీకి ఇది 9వ యాభైకి పైగా స్కోరు (ఒక సెంచరీ, ఎనిమిది హాఫ్ సెంచరీలు). ఇంతకుముందు ఈ రికార్డు భారత కెప్టెన్ స్మృతి మంధాన పేరిట ఉండేది. మంధాన 2024లో ఎనిమిది 50కిపైగా స్కోర్లు సాధించింది. తాజాగా తన కెప్టెన్ రికార్డునే షఫాలీ అధిగమించడం విశేషం. ఈ ఏడాది ఇప్పటివరకు 26 టీ20 మ్యాచ్‌లలో షఫాలీ మొత్తం 922 పరుగులు చేసింది.

103 పరుగుల స్వల్ప లక్ష్య ఛేదనలో స్మృతి మంధానతో కలిసి ఇన్నింగ్స్ ప్రారంభించిన షఫాలీ, ఆరంభం నుంచే దూకుడుగా ఆడింది. ఈ జోడీ తొలి వికెట్‌కు 96 పరుగుల భాగస్వామ్యం నెలకొల్పి విజయాన్ని ఖాయం చేసింది. షఫాలీ 24 బంతుల్లో హాఫ్ సెంచరీ పూర్తి చేసుకుని ఔటవగా, మంధాన 25 బంతుల్లో 47 పరుగులతో అజేయంగా నిలిచి జట్టును గెలిపించింది. భారత్ కేవలం 8.5 ఓవర్లలోనే లక్ష్యాన్ని ఛేదించింది.

అంతకుముందు బ్యాటింగ్ చేసిన జింబాబ్వే, నిర్ణీత 20 ఓవర్లలో 8 వికెట్ల నష్టానికి 102 పరుగులు మాత్రమే చేయగలిగింది. భారత బౌలర్ల ధాటికి జింబాబ్వే బ్యాటర్లు తడబడ్డారు. నికీ ప్రసాద్ 7 పరుగులిచ్చి 2 వికెట్లు పడగొట్టగా, మిగతా బౌలర్లు కూడా రాణించారు. జింబాబ్వే జట్టులో చిపో ముగేరి-తిరిపానో 34 పరుగులతో టాప్ స్కోరర్‌గా నిలిచింది. ఈ సిరీస్ విజయంతో, భారత మహిళల జట్టుకు పూర్తిస్థాయి కెప్టెన్‌గా బాధ్యతలు చేపట్టిన తర్వాత స్మృతి మంధాన తన తొలి సిరీస్‌ను గెలుచుకున్నట్లయింది.