సోషల్ మీడియా దిగ్గజం 'ఎక్స్‌' (ట్విట్టర్) కంటెంట్ క్రియేటర్లను ఆకర్షించేందుకు సరికొత్త కార్యక్రమానికి శ్రీకారం చుట్టింది. టిక్‌టాక్, ఇన్‌స్టాగ్రామ్ రీల్స్ వంటి ప్లాట్‌ఫామ్‌లకు గట్టి పోటీ ఇచ్చే లక్ష్యంతో 'వీడియో కిక్‌స్టార్ట్ బోనస్' అనే పైలట్ ప్రోగ్రామ్‌ను పరీక్షిస్తోంది. 

ఈ ప్రోగ్రామ్‌లో భాగంగా ఎంపిక చేసిన క్రియేటర్లకు 15 ఒరిజినల్ వీడియోలు పోస్ట్ చేసినందుకు గాను ఏకంగా 3,000 డాల‌ర్లు (సుమారు రూ. 2.85 లక్షలు) స్థిర మొత్తాన్ని చెల్లించనుంది.

ఈ ప్రోగ్రామ్‌కు అర్హత పొందాలంటే కొన్ని కచ్చితమైన నిబంధనలను పాటించాల్సి ఉంటుంది. ఎంపికైన క్రియేటర్లు 30 రోజుల వ్యవధిలో, 15 వేర్వేరు రోజుల్లో కనీసం 15 వీడియోలను పోస్ట్ చేయాలి. ప్రతి వీడియో నిడివి మూడు నిమిషాల లోపు ఉండాలి. ఈ కంటెంట్ పూర్తిగా ఒరిజినల్ అయి ఉండాలి లేదా సొంత క్రియేటివిటీ జోడించి ఉండాలి. ఇతర ప్లాట్‌ఫామ్‌ల నుంచి డౌన్‌లోడ్ చేసిన వాటర్‌మార్క్‌ ఉన్న వీడియోలను అప్‌లోడ్ చేస్తే వాటిని పరిగణనలోకి తీసుకోరు.

ఈ ప్రోగ్రామ్‌లో ఉన్న ముఖ్యమైన ఆకర్షణ ఏమిటంటే.. చెల్లింపులకు వీడియోల వ్యూస్ లేదా ఎంగేజ్‌మెంట్‌తో ఎలాంటి సంబంధం లేదు. నిర్దేశించిన సంఖ్యలో అర్హత కలిగిన వీడియోలను పోస్ట్ చేస్తే చాలు, స్థిరంగా రూ. 2.85 లక్షలు అందిస్తారు. ఇది క్రియేటర్లకు ఆదాయంపై భరోసా కల్పిస్తుంది. 

అయితే, ఇది ఆహ్వానం ద్వారా మాత్రమే అందుబాటులో ఉన్న కార్యక్రమం. 'ఎక్స్‌' సంస్థే నేరుగా క్రియేటర్లను ఎంపిక చేసి, వారికి ఆహ్వానాలు పంపిస్తోంది. అలా ఎంపికైన వారు తమ క్రియేటర్ స్టూడియో ద్వారా ఈ ప్రోగ్రామ్‌లో చేరవచ్చు.

ప్రస్తుతం నడుస్తున్న ఈ పైలట్ ప్రోగ్రామ్‌లో చేరడానికి అక్టోబర్ 30 చివరి తేదీ. ఇప్పటికే ఉన్న 'ఒరిజినల్ కంటెంట్ రివార్డ్స్' ప్రోగ్రామ్‌కు ఇది పూర్తిగా భిన్నమైనదని 'ఎక్స్‌' స్పష్టం చేసింది. వీడియో కంటెంట్‌ను ప్రోత్సహించడం ద్వారా తన ప్లాట్‌ఫామ్‌లో యూజర్ల ఎంగేజ్‌మెంట్‌ను పెంచుకోవాలనే వ్యూహంలో భాగంగానే 'ఎక్స్‌' ఈ అడుగు వేస్తున్నట్లు విశ్లేషకులు భావిస్తున్నారు.