సరికొత్త హారర్ అనుభూతిని పంచేందుకు మరో ఆసక్తికరమైన చిత్రం సిద్ధమైంది. స్టార్ డైరెక్టర్ ప్రశాంత్ నీల్ సమర్పణలో, ప్రముఖ‌ నిర్మాణ సంస్థ మైత్రీ మూవీ మేకర్స్ నిర్మిస్తున్న చిత్రం ‘418-ది నైట్‌మేర్ బిగిన్స్’. కీర్తన్ నడగౌడ దర్శకత్వం వహించిన ఈ సినిమా ట్రైలర్ తాజాగా విడుదలైంది. పాన్-ఇండియా స్థాయిలో రాబోతున్న ఈ సినిమా, హారర్ ప్రియులకు ఒక కొత్త అనుభవాన్ని ఇవ్వబోతున్నట్లు ట్రైలర్ చూస్తే అర్థ‌మ‌వుతోంది.

ఈ సినిమా కథ మొత్తం ఒక మెడికల్ కాలేజీ హాస్టల్ నేపథ్యంలో సాగుతుంది. దాదాపు 15 సంవత్సరాలుగా ఎవరూ తెరవని, ప్రవేశానికి అనుమతి లేని '418' నంబర్ గది ఈ కథకు కేంద్ర బిందువు. ఆ గదిలో దాగి ఉన్న అంతుచిక్కని రహస్యం ఏమిటి? దాని వెనుక ఉన్న భయానక చరిత్రను ఛేదించాలని ప్రయత్నించిన కొందరు విద్యార్థులకు ఎలాంటి భయానక అనుభవాలు ఎదురయ్యాయి? అనే అంశాలతో కథనం ఉత్కంఠభరితంగా సాగనున్నట్లు ట్రైలర్ ద్వారా తెలుస్తోంది.

సాధారణంగా హారర్ చిత్రాల్లో కనిపించే జంప్ స్కేర్స్‌కు భిన్నంగా, ఈ సినిమా ట్రైలర్‌ను చాలా ఇంటెన్స్‌గా తీర్చిదిద్దారు. గూస్‌బంప్స్ తెప్పించే విజువల్స్, ఊహించని మలుపులతో హారర్ ప్రియులను కట్టిపడేసేలా ఉంది. ముఖ్యంగా ప్రధాన పాత్ర పోషించిన నటి చైత్ర ఆచార్ నటన ఈ సినిమాకు ప్రధాన ఆకర్షణగా నిలవనుంది. భయాన్ని, ఆందోళనను ఆమె తన హావభావాల్లో పలికించిన తీరు సినిమాపై అంచనాలను మరింత పెంచుతోంది.

ఈ చిత్రానికి సాంకేతిక నిపుణుల పనితీరు పెద్ద బలంగా నిలిచింది. వెంకీ జీజీ అందించిన నేపథ్య సంగీతం భయానక వాతావరణాన్ని అద్భుతంగా ఎలివేట్ చేయగా, దినేశ్‌ దివాకరన్ సినిమాటోగ్రఫీ ఆ మూడ్‌ను పర్ఫెక్ట్‌గా తెరపైకి తీసుకొచ్చింది. కథ, కథనాల్లో తీవ్రత ఎక్కువగా ఉండటంతో సెన్సార్ బోర్డు ఈ చిత్రానికి ‘ఏ’ సర్టిఫికెట్ జారీ చేసింది. 

ప్రముఖ నిర్మాణ సంస్థ మైత్రీ మూవీ మేకర్స్ పతాకంపై నవీన్ యెర్నేని, వై. రవిశంకర్ ఈ చిత్రాన్ని అత్యున్నత నిర్మాణ విలువలతో నిర్మించారు. ఈ చిత్రం తెలుగుతో పాటు ఇతర ప్రధాన భాషల్లో అక్టోబర్ ఈ నెల‌ 23న ప్రపంచవ్యాప్తంగా గ్రాండ్‌గా థియేటర్లలో విడుదల కానుంది.

Play video