యువ హీరో ఆది సాయికుమార్ తన తదుపరి చిత్రాన్ని ప్రకటించారు. పాన్ ఇండియా స్థాయిలో భారీ అంచనాలతో తెరకెక్కనున్న ఈ చిత్రానికి 'ఆది రుద్ర' అనే శక్తివంతమైన టైటిల్‌ను ఖరారు చేశారు. త్రిశూల్ ఎంటర్‌టైన్‌మెంట్స్ పతాకంపై మంగళవారం ఈ ప్రాజెక్టును అధికారికంగా అనౌన్స్ చేశారు. విశ్వాసం, రహస్యం, ఉత్కంఠభరిత అంశాలతో సాగే ఒక డివైన్ మిస్టరీ థ్రిల్లర్‌గా ఈ సినిమాను రూపొందించనున్నట్లు చిత్రబృందం తెలిపింది. ఈ చిత్రంలో ఆది సాయికుమార్‌ను మునుపెన్నడూ చూడని సరికొత్త పాత్రలో చూపించనున్నట్లు తెలుస్తోంది.

'దండుపాళ్యం', 'కృష్ణ ప్రణయ సఖి' వంటి బ్లాక్‌బస్టర్ చిత్రాలను నిర్మించిన ప్రశాంత్ జి. రుద్రప్ప ఈ సినిమాకు నిర్మాతగా వ్యవహరిస్తున్నారు. త్రిశూల్ ఎంటర్‌టైన్‌మెంట్స్ బ్యానర్‌లో ఇది మూడో ప్రాజెక్ట్. నవరసన్ ఈ చిత్రానికి కథ, దర్శకత్వ బాధ్యతలు చేపట్టారు. 'ఆది రుద్ర' కథ 1960 నుంచి 1990 మధ్య కాలంలో సాగుతుందని, ఆ కాలం నాటి వాతావరణాన్ని ప్రతిబింబించేలా విజువల్స్, పాత్రలు, కథనం ఉంటాయని దర్శకుడు తెలిపారు. ప్రేక్షకులను ఒక ఆధ్యాత్మిక, రహస్య ప్రపంచంలోకి తీసుకెళ్లేలా సినిమా ఉంటుందని చెబుతున్నారు.

ఈ చిత్రానికి సంబంధించిన సాంకేతిక బృందం సినిమాపై అంచనాలను మరింత పెంచుతోంది. 'కాంతార', 'విరూపాక్ష', 'మంగళవారం', 'మహారాజ' వంటి సెన్సేషనల్ హిట్స్‌కు సంగీతం అందించిన ప్రముఖ సంగీత దర్శకుడు బి. అజనీష్ లోక్‌నాథ్ 'ఆది రుద్ర'కు స్వరాలు సమకూరుస్తున్నారు. ఎ.జె. శెట్టి సినిమాటోగ్రాఫర్‌గా పనిచేయనున్నారు.

భారీ బడ్జెట్‌తో, ఉన్నత సాంకేతిక విలువలతో రూపుదిద్దుకోనున్న ఈ సినిమా చిత్రీకరణను వచ్చే ఏడాది జనవరిలో ప్రారంభించేందుకు నిర్మాతలు సన్నాహాలు చేస్తున్నారు. తెలుగు, కన్నడ, తమిళం, హిందీ, మలయాళం భాషల్లో ఏకకాలంలో విడుదల చేసేందుకు ప్లాన్ చేస్తున్నారు. ప్రస్తుతం నటీనటులు, ఇతర సాంకేతిక నిపుణుల వివరాలను గోప్యంగా ఉంచినప్పటికీ, షూటింగ్ ప్రారంభమయ్యాక త్వరలోనే మరిన్ని వివరాలు వెల్లడించే అవకాశం ఉంది.